एमालेलाई आपत् : सरकारमा आफैं, सडकमा पनि

Share this
615shares
मुलुकी खबर
मुलुकी खबर
clock२०८१ चैत २९, शुक्रबार ०९:३६

विराटनगर । नेकपा (एमाले) अहिले सरकारको नेतृत्व गरिरहेको दल हो । नेपाली कांग्रेससहितको सरकारमा एमाले अध्यक्ष केपी शर्मा ओली प्रधानमन्त्री छन् ।

तर, सरकारको कामकारबाहीप्रति जनमानसमा असन्तुष्टि बढ्दो छ । आफैंले नेतृत्व गरिरहेको सरकारबाट यो चैं गतिलो काम भयो भनेर एमालेले पनि जनतालाई स्पष्ट पार्न सकेको छैन । हुन त नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ नेतृत्वको सरकारका कामकारबाहीप्रति पनि जनअसन्तुष्टि उत्तिकै थियो ।

ओलीले अहिले नेतृत्व गरेको सरकार दुईतिहाइ बहुमतको छ । कांग्रेससहित साना दलको समर्थनमा सरकारको नेतृत्व गरिरहेका ओलीलाई जनमुखी काम गर्नुपर्ने जिम्मेवारी छ । तर, सरकारमा बसेर जनपक्षीय काम गर्नुपर्ने एमालेले आफैं प्रतिपक्षी वा विरोधीजस्तो भएर सडकमा उत्रिनुपर्ने अवस्था आएको छ । अर्थात्, सरकारको नेतृत्व आफैंले गरिरहेका बेला सडकमा समेत आउनुपर्ने आपत् एमालेलाई आइपरेको हो ।

ओलीले सरकारबाट जनमुखी काम गर्छ छाडेर सडक तताउन आउने निर्णय लिएपछि विरोध एवं आलोचना धेरै भइरहेको छ । हुन त दलहरुकै कारण यो परिस्थिति बनेको हो । दलकै अकर्मण्यताले मुलुकमा व्यवस्था विरोधी गतिविधि बढिरहेको छ । राजावादीका नाममा हिंसात्मक आन्दोलनसमेत भयो ।

‘मुलुकमा राजा चाहिन्छ’ भनेर आवाज उठाउनेहरुलाई दलकै गलत गतिविधिले मलजल गरिरहेको तथ्य कतै लुक्दैन । सत्ताको नेतृत्व गरिरहेको एमाले मात्रै हैन, सत्तारुढ कांग्रेसदेखि प्रतिपक्षी माओवादीलगायत आफूलाई गणतन्त्र एवं लोकतन्त्रवादी भन्न रुचाउने दलहरुकै गतिविधिले व्यवस्थाविरुद्धको आवाजलाई मजवुत बनाएको विश्लेषण गर्न थालिएको छ ।

व्यवस्थालाई मजवुत बनाउने भन्दा पनि आफ्नै स्वार्थमा दलहरु रुमलिदा विरोधीले फाइदा लिन खोजेको देखिन्छ । मुलुक र जनताका लागि भन्दा पनि आफ्ना लागि मात्रै नेताहरु केन्द्रित बनेको आरोप लागिरहेको छ । मुलुक संकटको डिलमा पुग्दासमेत दल र नेताहरुबीचमा बेमेल बढ्दो अवस्थामा छ । सत्तामा पुग्ने र टिकाउनेमा नेता केन्द्रित छन् ।

तर, एकअर्कालाई आरोप लगाएर आफूले गरेको गल्ती एवं बदमासीबाट उम्किने प्रयास गरिरहेका छन् । विभिन्न अनियमितता, भ्रष्टाचार तथा जनविरोधी गतिविधिलाई शीर्ष नेताहरुले नै प्रश्रय दिइरहेको आरोप लाग्छ । उनीहरुको व्यवहार, गतिविधि र कामकारबाहीले उक्त आरोपलाई पुष्टि गर्छ ।

माओवादीकै अगुवाइमा बनेको समाजवादी मोर्चाले काठमाडौंमा प्रदर्शन गरेको थियो । व्यवस्थाविरुद्ध आवाज उठेको भन्दै प्रदर्शन गरिए पनि व्यवस्थालाई मजवुत बनाउनेतर्फ कसरी केन्द्रिन हुने भन्ने कुनै ‘भिजन’ नेताहरुमा छैन । उल्टै उनीहरुकै कारण व्यवस्था धराशायी बन्दै गइरहेको छ ।

लोकतान्त्रिक गणतन्त्र अहिलेको उत्तम व्यवस्था हो भन्न नेताहरुले छाडेका छैनन् । तर, सडकमा व्यवस्था विरोधी अन्दोलन बढ्दै जाँदा आफ्नो व्यवहार र शैली सुधार्नेतर्फ उनीहरुले ध्यान नदिएको राजनीतिक विश्लेषकहरु बताउँछन् ।

सत्तारुढ एमालेले चैत ३० गते अर्थात शनिबार झापाको दमकमा जनसभा तथा प्रदर्शन गर्दैछ । शुक्रबार बुटवलमा गर्दैछ । प्रधानमन्त्री एवं पार्टी अध्यक्ष ओलीकै गृहनगर दमकमा हुन लागेको जनसभालाई चासोका साथ हेरिएको छ । व्यवस्थामाथि धावा बोलिएको भन्दै यसअघि एमालेले विभिन्न ठाउँमा प्रदर्शन गर्यो ।

प्रतिगामीहरूलाई टाउको उठाउन नदिने भन्दै अझै केही ठाउँमा प्रदर्शन एवं जनसभा गर्ने एमालेको तयारी छ । जरा अभियानमार्फत वडा, टोलसम्म कार्यक्रम सञ्चालन गरिरहेको एमाले प्रतिगामीलाई तह लगाउँदै प्राप्त उपलब्धि रक्षाका लागि सक्षम रहेको दाबी गर्छ । तर, एमालेको जरा अभियान नै प्रभावकारी हुन सकेको छैन ।

एमाले नेताहरु अहिले सुदृढ एवं बलियो आधार तयार गर्न पार्टी परिचालन भइरहेका बेला अराजक तत्वहरुले मुलुकमा अवाञ्छित गतिविधि गरिरहेको दाबी गर्छन् । तर, आफैं सरकारमा भएको दलले त्यस्ता गलत र अवाञ्छित गतिविधि रोक्न किन सकेन वा चाहेन ? भन्ने प्रश्न उठेको छ ।

व्यवस्था विरोधी र अवाञ्छित गतिविधि बढेको भए नियन्त्रण गर्नुपर्ने वा असन्तुष्ट पक्षलाई मिलाएर अघि बढ्पर्नेमा आफैं सडकमा ओर्लिएपछि एमालेमाथि नैतिक प्रश्न नै उठेको हो । आफैं सरकारको नेतृत्वमा रहेका बेला विरोधीजस्तो सडकमा आउनु गलत भएको टिप्पणी हुन थालेको छ । प्रधानमन्त्री ओलीले दुईतिहाइको दम्भ देखाउन खोज्दा मुलुकको परिस्थिति भड्किदै गएको आरोप कतिपयको छ ।

‘सत्ताको नेतृत्व गरेको दल नै सडकमा आउन अलिक मिलेन,’ राजनीतिक विश्लेषक गिरिश भट्टराई भन्छन्, ‘यस्तो कार्य सत्ता नेतृत्वकर्तालाई सुहाउँदैन ।’ काम गर्नुपर्ने बेलामा सडकमा आइहाल्नुपर्ने अवस्था नरहेको उनले बताए । ‘ठूला २ दलको सरकार आफैंमा दम्भ जस्तो देखिन्छ । अहिले के त्यस्तो आइपर्याे सडकमा नओर्लि नहुने ? सरकारमा दुईतिहाइ छ । काम गर्नुपर्ने हो । तर, यहाँ त उल्टो भयो । कसका लागि सडकमा आउने ?,’ भट्टराईले प्रश्न गरे ।

सत्तारुढ दलले प्रदर्शन गर्नु भनेको सडकमा भिड देखाउनेबाहेक अरु केही नभएको उनी बताउँछन् । कानुन निर्माण गर्ने र ‘डेलीभरी’ दिने विषयमा बलियो सरकारलाई धेरै ठाउँ रहेको भन्दै भट्टराईले के का लागि सडक तताउने ? भनेर प्रश्न गरेका छन् । सरकारमा रहेका बेला जनतालाई राम्रा काम गरेर खुसी पार्नुको साटो आफैं सडकमा उपस्थित हुनुले गलत थिति बसाल्ने उनको विश्लेषण छ ।

‘काम गर्न बिर्सिएर सडकमा किन आउनु पर्याे ? संसदीय व्यवस्थामा सडक विपक्षीको हो । बलियो सरकार देखाउन सडकमा आउनै पर्दैन । जनमुखी काम गर्दा हुन्छ,’ भट्टराई भन्छन् ।

अर्का राजनीतिक विश्लेषक शान्तिराम भण्डारीको मत भने फरक छ । सत्तापक्षले सडकमा प्रदर्शन गर्नु नौलो नभएको उनले बताए । ५–५ वर्षको आवधिक निर्वाचनमा बीच–बीचमा आफ्नो शक्ति परीक्षणका लागि दलहरु सडकमा आउने भण्डारीको भनाइ छ ।

‘सरकारमै भए पनि सडकमा आउन नहुने भन्ने होइन । आउन मिल्छ । यसअघि पनि नेतृत्वकर्ता दलहरु आएका छन् । यो दलहरुले गरेको आफ्नो परीक्षण हो । गलत तरिकाले व्याख्या गर्न हुँदैन’ उनले भने ।

राजनीतिक विश्लेषक मणि दाहाल सरकारको नेतृत्व गरिरहेको दल सडकमा आउनु गलत भएको बताउँछन् । ‘राजनीतिक नैतिकता हुँदा सरकारको नेतृत्व गरेको दल सडकमा आउँदैन । जनताको आवाज सम्बोधन हुनेगरी काम गर्छ । नैतिकता नहुँदा जेगर्दा पनि हुन्छ,’ उनले भने ।

सरकारले काम गर्न नसक्दा जनतामा आक्रोश बढेको सम्झदै दाहालले आफ्नो कर्तव्य भुलेर सरकार सडकमा आएको बताए । ‘सडकमा आउने सबै राजावादी होइनन् । सरकारले काम गर्न नसकेपछिको असन्तोष पोखिएको हो । बलियो सरकारले काम गर्नुपर्ने हो । सडकमा प्रदर्शन होइन,’ उनी भन्छन् ।

एमाले कोशी प्रदेश अध्यक्ष घनश्याम खतिवडा व्यवस्थामाथि नै धावा बोलिन थालेपछि देशव्यापी रुपमा सडकमा आउनु परेको दाबी गर्छन् । सडकबाट जनतालाई सचेत गराइने उनले बताए । सत्तामा रहेको दल सडकमा आउन मिल्दैन भन्नु लगत भएको खतिवडा बताउँछन् ।

‘सरकारविरुद्ध मात्रै सडकमा आउनुपर्छ भन्ने बुझाइ गलत छ । लोकतन्त्र बलियो बनाउनका लागि जागरणसभा गर्न थालिएको हो,’ उनले भने, ‘धेरै कुराहरुमा जनतालाई भ्रममा पार्न खोजिएको छ । त्यसलाई चिर्न जागरणसभा गर्नैपर्ने अवस्था आयो ।’ मुलुकमा राजनीतिक अस्थिरता र प्रतिगामी तत्वहरु सलबलाएकाले जनतालाई सचेत गराउन आवश्यक रहेको खतिवडाले बताए ।

उनका अनुसार एमालेको मिसन ८४ र ‘समृद्ध नेपाल, सुखी नेपाली’को लक्ष्यलाई कमजोर बनाउन प्रतिगामीहरूले अराजक गतिविधि बढाएको पार्टीको निष्कर्ष छ । दमकमा हुने सभामा १ लाख कार्यकर्ता उतार्ने तयारी रहेको जानकारी उनले दिए । उक्त जनसभामा झापा मोरङ, सुनसरी उदयपुरसहित कोशी प्रदेशका सबै जिल्लाबाट प्रतिनिधि आउने खतिवडाले बताए ।

तपाइको प्रतिक्रिया
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
© 2024 Muluki Khabar. All Rights Reserved. Design & Develop By: Indesign Media Pvt. Ltd.