‘नो केबलकार’ समूहको निसानामा योगेश भट्टराई

Share this
766shares
मुलुकी खबर
मुलुकी खबर
clock२०८२ बैशाख ६, शनिबार २०:००

विराटनगर । नेकपा (एमाले)का सचिव एवं ताप्लेजुङबाट निर्वाचित प्रतिनिधिसभा सदस्य योगेश भट्टराई बारम्बार ‘नो केबलकार’ समूहको निसानामा परिरहेका छन् ।

‘नो केबलकार’ समूहले पाथीभरा मुक्कुमलुङ क्षेत्रमा निर्माणाधीन केबलकारको विरोध गर्दै आएको छ । भट्टराई आफ्नो गृहजिल्ला जाँदा कालो झण्डा देखाउने, आक्रमण एवं दुर्व्यवहार गर्नेजस्ता हर्कतहरु भइरहेका छन् ।

फक्ताङलुङ गाउँपालिका–६ लेलेपमा आयोजित कञ्चनजंघा हीरक महोत्सवमा सहभागी हुन पुगेका पूर्वपर्यटन मन्त्री भट्टराईविरुद्ध शुक्रबार नाराबाजी भयो । हीरक महोत्सवको उद्घाटनका लागि संस्कृति, पर्यटन तथा नागरिक उड्ययन मन्त्री बद्रीप्रसाद पाण्डेसहित नेता भट्टराई हेलिकोप्टरबाट ताप्लेजुङको लेलेप पुगेका थिए ।

महोत्सवमा सहभागी भएर काठमाडौँ फर्किने बेला कञ्चनजंघा संरक्षण क्षेत्र व्यवस्थापन परिषद्को भवनमा रहेको शौचालयतिर जाने क्रममा उनीविरुद्ध नाराबाजी भएको हो । आन्दोलनकारीले शौचालयमै घेरा हालेपछि प्रहरीले शौचालयको ढोकामा चुकुल लगाएर भट्टराईलाई सुरक्षा दिएको थियो ।

प्रहरीले भिड तितरबितर पारेर हेलिकोप्टरसम्म पुर्यायो । केबलकार निर्माणलाई विवादमा ल्याएर ‘नो केबलकार’ समूहको नाममा भट्टराईमाथि अराजक गतिविधि भइरहेका छन् । अराजक गतिविधिका कारण भट्टराई आफ्नै गृहजिल्लामा असुरक्षित हुने अवस्था बनेको छ ।

महोत्सवमा सहभागी भएर काठमाडौं फर्किने बेला भट्टराईविरुद्ध नाराबाजी भएको थियो । महोत्सवको उद्घाटन सकिएपछि मन्त्री पाण्डे हेलिकप्टर भएतिर गएका थिए । उनीसँगै रहेका भट्टराई भने कञ्चनजंघा संरक्षण क्षेत्र व्यवस्थापन परिषद्को भवनमा रहेको शौचालयतिर लागे ।

भट्टराई सिंढी चढेर शौचालय उक्लिन थालेपछि ‘नो केबलकार’ समूहकाहरु नाराबाजीमा उत्रिए । आन्दोलनकारीको संख्या थपिँदै गएपछि सुरक्षा व्यवस्था कडा पारियो । प्रहरीले हेलिकोप्टरसम्मै सुरक्षा दिएर लैजानु परेको थियो ।

भट्टराईमाथि आक्रमणसम्मकै प्रयास भएपछि प्रहरी र आन्दोलनकारीबीच घम्साघम्सीसमेत भएको थियो । आन्दोलनकारीमध्येका केदारजंग ताप्मादेनले प्रहरीसँग ठेलमठेल भएको बताए ।

लिम्बू संस्कार संस्कृतिमाथि भट्टराईले प्रहार गरेकाले आफूहरूले विरोध स्वरुप प्रदर्शन गरेको उनको दाबी छ । तर, भट्टराईले कुनै जातजातिको संस्कार संस्कृतिमाथि प्रहार गरेको जानकारीमा छैन ।

भट्टराई आएपछि लिम्बू समुदायको च्याब्रुङ नाचपनि कार्यक्रमस्थलमा देखाउन नपाएको ताप्मादेनको दाबी छ । च्याब्रुङ (केलाङ) नाच्नेहरू स्टेजमा फन्को लगाएर बाहिरिएका थिए । ’उहाँ लिम्बू समुदायको संस्कृतिप्रति पोजेटिभ हुनुहुन्न । कार्यक्रममा च्याब्रुङ पनि देखाइएन,’ उनको दाबी छ ।

पाथीभरा मुक्कुमलुङ केबलकारको विषयलाई लिएर ‘नो केबलकार’ पक्षधर भट्टराईको विरोधमा छन् । कञ्चनजंघा संरक्षण क्षेत्र व्यवस्थापन परिषद्को आयोजनामा भएको कञ्चनजंघा हीरक महोत्सव आयोजक समितिका संयोजक खगेन्द्र फेम्बो लिम्बू केबलकार खारेजी संयुक्त संघर्ष समितिका संयोजकसमेत छन् ।

शुक्रबारको कार्यक्रम फेम्बुकै अध्यक्षतामा भएको थियो । मन्त्रीलगायतका पाहुनालाई स्वागत र बिदाइ गर्न फेम्बू आफैं उपस्थित थिए । स्वागतको क्रममा फेम्बुले मन्त्रीलाई खादा लगाइदिए । तर, भट्टराई लगायतका अरु अतिथिलाई लगाइदिएनन् ।

भट्टराईविरुद्ध नाराजुलुस हुँदा फेम्बु भने मन्त्री पाण्डेसँगै थिए । फेम्बुले भने समुदायले दिउँसो कार्यक्रमस्थलमै कालो झण्डा देखाउने र विरोध गर्ने कार्यक्रम बनाएपनि आफूले त्यस्तो नगर्न आग्रह गरेको बताए । भट्टराई आयोजकको निमन्त्रणामै लेलेप पुगेका थिए ।

निम्ता दिएर बोलाएको आयोजकले उनीविरुद्ध नाराबाजी हुँदा भने कुनै प्रतिक्रिया जनाएन । नेता भट्टराईले सामाजिक सञ्जाल फेसबुकमार्फत पनि घटनाको जानकारी गराएका छन् । उनले विवेक पुर्याएर काम गर्न र प्रायोजकहरूको हतियार नबन्न तथा सामाजिक एकता र सद्भाव नबिगार्न सबैमा आह्वान गरेका छन् ।

महोत्सवको उद्घाटन सकेर फर्कने क्रममा केही व्यक्तिहरूले आफूविरुद्ध नारा लगाएको उनले बताए । ‘कार्यक्रम सकेर फर्कने क्रममा २–४ जनाले मेराविरुद्ध नारा लगाएछन् । नेपाली जनताको लामो संघर्षबाट प्राप्त लोकतान्त्रिक अधिकारको प्रयोग गरेछन् । मलाई कुनै दुःख छैन । सवाल विरोध वा समर्थन सभ्यताको सीमाभित्र हुनु पर्दछ । जसले जति जानेको छ वा जे गर्न लगाइएको छ, त्यति नै गर्ने हो । मेरो आग्रह विवेकले काम गरौं । प्रायोजकहरूको हतियार नबनौं । सामाजिक एकता र सदभाव नबिगारौं,’ भट्टाईले फेसबुकमा लेखेका छन् ।

कञ्जनजंघा हिमाल आरोहणको ७० वर्ष पुगेको अवसरमा ताप्लेजुङको लेलेपमा शुक्रबारदेखि कञ्चनजंघा महोत्सव सुरु भएको छ । महोत्सव आइतबारसम्म चल्ने छ ।

भट्टराईमाथि भएको हर्कतको एमाले ताप्लेजुङले विज्ञप्तिमार्फत भत्र्सना तथा खेद व्यक्त गरेको छ । एमाले ताप्लेजुङका कार्यवाहक अध्यक्ष दीपेन्द्र पोमुद्वारा जारी विज्ञप्तिमा अराजक गतिविधि गर्नेलाई कानुनी कारबाहीको दायरामा ल्याउनसमेत माग गरिएको छ ।

तपाइको प्रतिक्रिया
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
खराब मौसमले विराटनगरका बिहानका सबै उडान रद्द, सयौँ यात्रु प्रभावित
इनम सापकोटा प्रकरणमा सरकारको अनुसन्धानमाथि पोखरेलको प्रश्न
कनकाईमा आगजनीबाट दुई कुन्यूको धान र पराल नष्ट
एकै महिनामा १२ हजारभन्दा बढी चालक कारबाहीमा
© 2024 Muluki Khabar. All Rights Reserved. Design & Develop By: Indesign Media Pvt. Ltd.