
विराटनगर । विराटनगरमा जारी ‘विराट ट्रेड एक्स्पो’ शनिबार समापन भएको छ । एक्स्पो समापन समारोहका प्रमुख अतिथि उद्योग, वाणिज्य तथा आपूर्ति मन्त्री अनिलकुमार सिन्हाले राष्ट्रको आर्थिक तथा व्यावसायिक क्षेत्रमा महोत्सवले नवीन उत्साह सञ्चार गरेको बताए ।
मोरङ उद्योग व्यापार संघ विराटनगरले पुस ९ गतेदेखि १९ गतेसम्म आयोजना गरेको एक्स्पो समापनका क्रममा उनले यस प्रकारको एक्स्पोले नवीनतम प्रविधि र व्यावसायिक सञ्जाल निर्माण गर्न महत्त्वपूर्ण योगदान पुर्याउने उनले प्रस्ट्याए ।
मन्त्री सिन्हाले नेपालको औद्योगिक विकासमा विराटनगरको अत्यन्त गौरवशाली इतिहास रहेको चर्चा गर्दै उद्यमशीलताको विकासमा यस क्षेत्रका अग्रज उद्यमीहरूले दूरदर्शी रूपमा मुलुकमा औद्योगिक क्रान्ति ल्याएको बताए ।
कोशी प्रदेश आर्थिक समृद्धिको असीम सम्भावना बोकेको औद्योगिक क्षेत्रले १६ प्रतिशत ग्राहस्थ उत्पादन र २५ प्रतिशत औद्योगिक उत्पादन गरी राष्ट्रलाई योगदान पुर्याएको छ ।
मन्त्री सिन्हाले नेपाल-भारत परिवहन सन्धिको संशोधनले कलकत्ता र विशाखापटनम बन्दरगाहबाट विराटनगर–जोगबनीसम्म रेलमार्फत सबै किसिमका कार्गो ढुवानीको कानुनी बाटो खुलाले व्यापार सहजीकरण र ढुवानी भाडा घट्ने विश्वास व्यक्त गरे ।
सरकार फागुन २१ गतेको निर्वाचन सम्पन्न गरी राष्ट्रलाई राजनैतिक स्थायित्वको मार्गमा अग्रसर गराउन अगाडि बढेको उनले बताए ।
संघका अध्यक्ष अनुपम राठी, एक्स्पोका संयोजक अमितकुमार सारडा र पूर्वअध्यक्ष नवीन रिजालले एक्स्पोले नयाँ उद्यमी र व्यवसायी जन्माउन सहयोग पुर्याउने विश्वास व्यक्त गरे ।
एक्स्पोमा नेपालका घरेलु, साना, मझौला तथा ठुला उद्योगका उत्पादन, अटोमोबाइल क्षेत्रका साथै भारत, बंगलादेश, पाकिस्तानका उत्पादित वस्तुहरूका स्टल रहेको थियो । एक्स्पोमा करिब ३० करोडको कारोबार भएको आयोजकले जनाएको छ ।

























