कोशी अस्पताललाई आँखाको उपकरण हस्तान्तरण

विराटनगर । विराटनगरस्थित कोशी अस्पताललाई आँखा उपचार गर्ने उपकरण हस्तान्तरण गरिएको छ ।

आँखा उपचार सेवाका लागि १ करोड ६० लाख रुपैयाँ बराबरको अत्याधुनिक उपकरण जापान सरकारले उपलब्ध गराएको हो । अस्पतालमा आयोजित एक कार्यक्रममा जापानी राजदूतावासका उपप्रमुख तामुरा ताकाहिरोले आँखा उपचारको स्तरवृद्धि गर्नका लागि ७ वटा ठूला र अन्य उपकरण हस्तान्तरण गरेका छन् ।

अस्पताल विकास समितिका अध्यक्ष डा. फरवार्ड सिलवालका अनुसार ‘ग्रासरुट ह्युमन सेक्युरिटी प्रोजेक्ट’अन्तर्गत जापान सरकारले उपकरण प्रदान गरेको हो । बिरामीको सफल उपचारका लागि अस्पतालले स्रोत र साधनसहित गुणस्तरीय उपकरण जुटाउँदै आएको सिलवालले बताए ।

प्रदेशकै ठूलो सरकारी अस्पतालका रुपमा परिचित कोशीमा आँखाको उपचारका लागि मोरङबाट मात्र नभएर आसपास र पहाडी जिल्लासँगै भारतबाट समेत बिरामी आउने गरेको जानकारी उनले दिए । अस्पतालकी आँखा विभाग प्रमुख डा. आश्मा केसीका अनुसार जापान सरकारले मोतियाविन्दु र जलविन्दुको उपचारका लागि विभिन्न ७ वटा उपकरण र अन्य सामाग्री प्रदान गरेको छ ।

विगत ३ महिनादेखि मोतियाविन्दुको शल्यक्रिया हुँदै आएको बताउँदै डा. केसीले भनिन्, ‘हामीकहाँ स्वास्थ्य बिमाबाट उपचार सुरु गराउन थालेपछि बिरामीको चाप बढ्दै गएको छ । बिमासँगै अस्पतालले आर्थिक अवस्था कमजोर भएका बिरामीलाई समेत सेवा दिँदै आएको छ । अहिले जापान सरकारले उपलब्ध गराएको उपकरणले बिरामीको उपचारमा थप सहजता हुनेछ ।’

उनका अनुसार हस्तान्तरण भएका सामाग्रीमध्ये ओपीडीमा ५ वटा र शल्यक्रियामा २ वटा प्रयोग हुन्छन् । हस्तान्तरण गरिएका उपकरण आँखाको प्रेसर चेकजाँच, अल्ट्रासाउण्ड, आँखाको पर्दा परीक्षण, शल्यक्रिया, आँखाको मोटाइ नाप्न, आँखामा भएको पावर परीक्षण गर्न प्रयोगमा आउने डा. केसीले बताइन् ।

उपकरण हस्तान्तरण कार्यक्रममा विराटनगर महानगरका मेयर नागेश कोइराला, अस्पतालका निमित्त मेडिकल सुपरिटेन्डेन्ट डा. रविनराज सिंहलगायतको उपस्थिति थियो । कोशी अस्पतालमा आँचा उपचारका लागि ६ जना चिकित्सक कार्यरत छन् ।

अस्पतालमा दैनिक ३५ देखि ४० जना नेपाली र गैह्रनेपाली नागरिक आँखाको उपचार र परीक्षणका लागि पुग्ने गरेका छन् । अस्पतालमा वार्षिक ३ लाख बिरामीले विभिन्न रोगको उपचार सेवा लिँदै आएका छन् ।