
काठमाडौं । विभागी टोली नेपाल पुलिस क्लबले डबल ह्याट्रिक गोल गर्दै शानदार जित निकाल्दा संकटा र चन्द्रपुर नगरपालिकाले अंक बाँडको छन् ।
एन्फा महिला लिग प्रतियोगिताअन्तर्गत शुक्रबार भएको खेलमा पुलिसले सुदूरपश्चिम प्रदेशलाई ९–० फराकिलो गोल संख्याले पराजित गरेको छ । पुलिसकी निरु थापा र दीपा न्यौपानेले ह्याट्रिक पूरा गरे भने पूजा राना मगर, अनुष्का शेर्पा र जिमकुमारी गुरुङले समान १–१ गोल गर्दै टोलीलाई शानदार जित दिलाए ।
पहिलो खेलमा नेपाल एपिएफ क्लबसँग बराबरीमा रोकिएको पुलिसले पहिलो जित निकालेको हो । सुदूरपश्चिमले भने लगातार दोस्रो हार बेहोरेको छ । पहिलो खेलमा सुदूरपश्चिम बागमती युथ क्लबसँग पराजित भएको थियो ।
त्यस्तै अर्को खेलमा संकटा क्लब र चन्द्रपुर नगरपालिका गोलरहित बराबरीमा खेल्दै अंक बाँडेका छन् ।
पहिलो खेलमा विभागी टोली त्रिभूवन आर्मी क्लबसँग पराजित संकटाले पहिलो अंक जोडेको हो भने चन्द्रपुरको यो यो दोस्रो बराबरी नतिजा हो । चन्द्रपुर पहिलो खेलमा कर्णाली प्रदेशसँग बराबरीमा रोकिएको थियो ।























