
विराटनगर । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले ३ ठूला दल भनिएकाहरुबाट देशमा संकट आउन थालेको बताएका छन् ।
विराटनगरमा सोमबार आयोजित ज्येष्ठ सदस्य सम्मान तथा पार्टी प्रवेश कार्यक्रमलाई सम्बोधन गर्दै अध्यक्ष लिङ्देनले ठूला दलकै कारण देशमा संकट आएको बताएका हुन् । उनले पछिल्लो समय राजनैतिक अस्थितरताले देश र धर्म दुवै संकटमा परेको बताए ।
विभिन्न कारण देश र धर्म संकटमा रहेको हुँदा जोगाउनु पर्ने बताउँदै, अध्यक्ष लिङ्देनले भने, ‘अहिले विभिन्न राजनीतिक घटनाक्रमले देश र धर्म दुवै संकटमा रहेको छ । देशको अस्तित्व पनि खतरामा पर्दै गएको छ । यसलाई जोगाउने एक मात्र हाम्रा पार्टी हो ।’
माओवादी, एमाले, काँग्रेसलगायतका पार्टीले हाम्रो राष्ट्रियता सार्वभोम खतरामा रहेको कुरा बिर्सिएको अध्यक्ष लिङ्देनले जोड दिए । उनले भने, ‘हाम्रो देशको अस्तित्व खतरामा छ । त्यसलाई जोगाउनु पर्नेछ । देश जोगाँउदै बनाउनु पर्नेछ । अहिलेको व्यवस्था, अहिलेकै नेतृत्वबाट अब देश बन्दैन ।’
एमाले काँग्रेसको दुई तिहाइको सरकार कुहिरोमा हराएको काग झैं भएको छ । अध्यक्ष लिङ्देनले संविधान त्रुटी नै त्रुटीको बण्डल भएको उल्लेख गरे । दुई दलले आफ्नो अकर्मण्डयतालाई ढाक छोप गर्नका लागि गठबन्धन गरेका हुन् ।
अहिले संविधान संशोधनको कुरा गरेको बताउँदै, अध्यक्ष लिङ्देनले भने, ‘संविधानलाई त हामीले बारम्बार भनेका छौ, संविधान त्रुटी नै त्रुटीको बण्डल हो । यो पनि जोड्ने त्यो पनि जोड्ने भनेर दश तिरका कुरा बोकेर जोड्ने हुँदा संविधानलाई कुरुप अवस्थामा पुर्याए । आज यो संविधानसमेत देशको समस्या भएको छ ।’
देशमा अभिभावकीय संस्थाको रुपमा राजा ल्याउने व्यवस्था हुनुपर्छ । जनताले प्रत्यक्ष निर्वाचित हुने कार्यकारी प्रधानमन्त्री बनाउने व्यवस्था हुनुपर्ने, अध्यक्ष लिङ्देनले बताए ।

























