
विराटनगर । कोशी प्रदेशका पूर्वमुख्यमन्त्री केदार कार्कीले सुरु गरेको अनशनस्थलमा स्थानीय प्रशासनले हस्ताक्षेप गरेको छ ।
त्यस क्रममा सुरक्षाकर्मी र कार्कीका समर्थकबीच दोहोरो झडप भएको छ । निषेधित क्षेत्रमा आमरण अनशन बसेका कार्की र उनका समर्थकलाई हट्नका लागि स्थानीय प्रशासनले आग्रह गरेको थियो ।
माइकिङ गर्दा पनि नहटिकन अनशनलाई निरन्तरता दिएपछि स्थानीय प्रशासनले हस्तक्षेप गरेको हो । अहिले दुई पक्षबीच दोहोरो झडप भइरहेको छ ।
केदारका समर्थकले सुरक्षाकर्मीलाई ढुंगामुडा गरिरहेका छन् । सुरक्षाकर्मीले लाट्ठी चार्ज गरेको छ । झडपमा परेर केही अनशनकारी र सुरक्षाकर्मी घाइते भएका छन् ।
केदारका समर्थक १ जनालाई प्रहरीले पक्राउ गरेको छ । थप विवरण आउन बाँकी छ ।

























