‘पूर्णबहादुरको सारंगी’ अत्यधिक ‘हिट’, कमायो सार्वाधिक

काठमाडौं । नेपाली कथानक चलचित्र ‘पूर्णबहादुरको सारंगी’ अत्यधिक ‘हिट’ भएको छ । यो चलचित्र सर्वाधिक कमाइ गर्नेमा परेको हो ।

लक्ष्मीपूजालाई लक्षित गर्दै यही कात्तिक १५ गतेदेखि प्रदर्शनमा आएको चलचित्रले नेपालमा बनेका अरु चलभित्रभन्दा धेरै कमाइ गरेको हो । निर्माता विनोद पौडेलले चलचित्रले प्रदर्शनको १४ औँ दिनसम्म आइपुग्दा २७ करोडको व्यापार भइसकेको जानकारी दिए ।

उनका अनुसार दर्शकले नेपाली चलचित्रलाई पनि माया गर्ने गरेको उदाहरणका रूपमा ‘पूर्णबहादुरको सारंगी’लाई लिन सकिने बताए । भने, ‘हामीलाई माया गर्नु हुने सबै दर्शकलाई धन्यवाद भन्छु । उहाँहरुलाई धन्यवाद दिने शब्द पनि छैन ।’

नेपालभर चलचित्र हेर्ने दर्शकको चाप उस्तै भएपछि निर्माण समूह मोफसल भ्रमणमा निस्किएको छ । निर्माता पौडेलले आज (बिहीबार) देखि पूर्वबाट सुरु हुने भ्रमणमा मोफसलका चलचित्र भवनमा पुगेर दर्शकलाई धन्यवाद व्यक्त गरिने बताए ।

उनले उदयपुरको गाईघाटबाट भ्रमण सुरु गरिने जानकारी दिए । दर्शकको अपार मायाले चलचित्र निर्मातालाई हौसला मिलेको उनको भनाइ छ ।