देशभरका न्यूरो सर्जन इटहरीमा भेला हुँदै

विराटनगर । नेपाल न्यूरो सर्जन समाज (निसोन)को ११ औं राष्ट्रिय सम्मेलन सुनसरीको इटहरी हुँदैछ । बिहीबार विराटनगरमा आयोजित पत्रकार सम्मेलन गर्दै सम्मेलनको जानकारी दिइएको हो ।

‘प्रविधिसँगको न्यूरो सर्जरीको विकास’ भन्नै मूल नाराका साथ शुक्रबार र शनिबार हुने राष्ट्रिय सम्मेलनको सम्पूर्ण तयारी पूरा भएको समाजका अध्यक्ष डाक्टर यमबहादुर रोकाले जानकारी दिए ।

उनले राष्ट्रिय सम्मेलनमा नेपालभरका न्यूरो सर्जनसहित सम्बन्धित विशेषज्ञ चिकित्सक, नर्स, प्राविधिक, फिजियोथेरापिष्ट तथा श्रीलंका, बंगलादेश, पाकिस्तानलगायत देशका विशेषज्ञ गरेर करिब १ सय ५० जना बढीको सहभागिता हुने बताए ।

सम्मेलनका क्रममा विशेषज्ञहरुले १ सय बढी अनुसन्धान कार्यपत्र प्रस्तुत गर्ने छन् । विज्ञहरुले विभिन्न विधामा प्रस्तुत गरे कार्यपत्रमध्ये सर्वश्रेष्ठ कार्यपत्र सम्मान र पुरस्कार पनि प्रदान गरिने डा. रोकाले बताए ।

विगतमा काठमाडौंमा मात्रै हुँदै आएको सम्मेलनलाई २ वर्षदेखि काठमाडौं बाहिर आयोजन गर्न थलिएको हो ।

यस्ता प्रकारका सम्मेलन नेपालमा रहेको न्यूरो सम्बन्धी विकासका साथै विभिन्न उपचारका पद्धतिबारे सबैलाई जानकारी हुनेहुँदा सामान्य उपचारका लागि विदेश जानु नपर्ने सन्देशसमेत दिने भएकोले पूर्वमा पहिलो पटक सम्मेलन आयोजना गर्न लागेका हौ, डा. रोकाले भने ।

राष्ट्रिय सम्मेलनको पूर्वसन्ध्यामा बिहीबार विराटनगरस्थित नोबेल मेडिकल कलेजमा एक दिने कार्यशाला गोष्ठी समाजले आयोजना गरेको छ । उक्त गोष्ठीमा विज्ञ चिकित्सकहरुले विभिन्न विषयहरुमा जानकारी गराएका थिए ।