
काठमाडौं । ताप्लेजुङको पाथिभरा क्षेत्रमा केबलकार निर्माणको विषयमा देखिएको समस्या वार्ता मार्फत समाधान गर्नुपर्ने नेकपा एमाले नेता तथा ताप्लेजुङका सांसद योगेश भट्टराईले बताएका छन् ।
शनिबार पाथिभरा क्षेत्रको बलुडाँडामा प्रहरी र केबलकार निर्माणको विपक्षमा रहेको समूहबीच झडप भएको थियो । झडमा २६ जना घाइते भएका छन् । जस मध्ये दुई जनालाई प्रहरीले चलाएको गोली लागेको थियो ।
बुधबार पत्रकार सम्मेलन गर्दै भट्टराईले पाथीभरामा केबलकार निर्माणबारे भइरहेको विवाद वार्तामार्फत समाधान गर्नुपर्ने बताएका हुन् ।
सबै पक्षलाई समेटेर वार्ता गर्नुपर्ने उनको भनाई छ ।
उनले केबलकार निर्माणपछि केबलकारमा ७० वर्षभन्दा माथि र १० वर्षमुनिकालाई निशुल्क सेवा दिनु पर्ने बताए ।
निर्माण कम्पनीले प्रभावित क्षेत्रका बासिन्दालाई सेयर दिनुपर्ने उनको माग छ ।
केबलकार सेवामा ताप्लेजुङ बासिन्दालाई ५० प्रतिशत सहुलियत दिनुपर्ने उनले बताए ।
























