
काठमाडौं । नेकपा माओवादी केन्द्र निकट विद्यार्थी संगठन अखिल (क्रान्तिकारी)को अध्यक्षमा विजय प्रकाश सापकोटा विजयी भएका छन् । निकटतम् प्रतिस्पर्धी हेमन्त राईलाई ७१ मतको अन्तरले पराजित गर्दै अध्यक्षमा विजयी भएका हुन् ।
निवर्तमान उपाध्यक्ष केशव रावलका अनुसार सापकोटाले ६ सय ८६ मत प्राप्त गरेका छन् । राईले ६ सय १५ मत प्राप्त गरेका छन् । अध्यक्षका अर्का उम्मेदवार उपदेश कुमार यादवले ३ सय १० र सुदिन पौडेलले १ सय ९२ मत प्राप्त गरेका छन् ।
अध्यक्षका लागि चार जनाको उम्मेदवारी परेको थियो । सापकोटा अध्यक्ष पुष्पकमल दाहाल प्रचण्ड पक्षधरहरुको प्यानलका उम्मेदवार थिए । जनार्दन शर्मा पक्षधरको प्यानलबाट राईले उम्मेदवारी दिएका थिए । यादव नारायणकाजी श्रेष्ठ र पौडेलले वर्षमान पुन पक्षधरको प्यानलबाट उम्मेदवार बनेका थिए । निर्वाचन समितिले औपचारिक घोषणा भने गर्न बाँकी छ ।
























