
काठमाडौं । राष्ट्रिय स्वतन्त्र पार्टी (रास्वपा)की सांसद तोसिमा कार्कीले सरकारले सदनप्रति देखाएको अनुत्तरदायी र जवाफहीन व्यवहारले लज्जावोध भइरहेको बताएकी छन् ।
प्रतिनिधिसभाको बैठकमा बोल्दै उनले यस्तो बताएकी हुन् । आजभन्दा ५ महिना अगाडि साउन २१ मा सदनमा नेपाल रेडक्रस सोसाइटीमा भएको चरम भ्रष्टाचारको विषयमा सरकारसँग जवाफ माग गरेको तर आजसम्म पनि त्यसको जवाफ नआएकोमा उनले आपत्ति जनाइन् ।
उनले भनिन्, ‘आज मलाई यो सरकारले सदनप्रति देखाएको अनुत्तरदायी जवाफहीन व्यवहार देखेर लज्जावोध भइरहेको छ । ५ महिना अगाडि साउन २१ २०८१ मा यही सदनमा उभिएर मैले नेपाल रेडक्रस सोसाइटीमा भएको चरम भ्रष्टाचारको विषय उठाएको थिएँ । तर सरकारले जवाफ दिएन।’
























