
विराटनगर । नेकपा (एमाले) आबद्ध पत्रकारहरुको संगठन प्रेस चौतारी नेपालको १० औं केन्द्रीय महाधिवेशन कोशी प्रदेशको राजधानी विराटनगरमै हुने भएको छ ।
चौतारीले यसअघि नै विराटनगरमा महाधिवेशन गर्ने तय गरेको थियो । तर, स्थान फेर्न सकिने विषयमा पनि छलफल चल्यो । यद्यपि, महाधिवेशन गर्ने स्थान भने परिवर्तन नहुने भएको छ ।
महाधिवेशनको मिति चैं सरेको छ । फागुन २५ देखि २७ गतेसम्म आयोजना गर्ने भनिएको महाधिवेशन चैत १० र ११ गतेलाई सरेको हो ।
प्रेस चौतारीका महासचिव हिरामान लामाले विज्ञप्ति जारी गरेर व्यवस्थापनलगायतका प्राविधिक कारणले महाधिवेशनको मिति सरेको जानकारी दिए । पूर्वनिर्धारित समयमा प्रदेश र जिल्लाको अधिवेशन हुन नसकेका कारण महाधिवेशनको मिति सार्नु परेको लामाले बताए ।
चौतारीको १० औं महाधिवेशनलाई उत्सवका रूपमा सम्पन्न गर्न लागिएको उनको भनाइ छ । महाधिवेशनको उद्घाटन प्रधानमन्त्री एवं एमाले अध्यक्ष केपी शर्मा ओलीले गर्ने तय भएको छ ।

























