दीपक थापा प्रहरी महानिरीक्षक नियुक्त

Share this
713shares
मुलुकी खबर
मुलुकी खबर
clock२०८१ चैत ४, सोमबार १८:४६

काठमाडौं । नेपाल प्रहरीको महानिरीक्षक (आईजीपी)मा दीपक थापा नियुक्त भएका छन् । उनी नेपाल प्रहरीको ३१ औं प्रमुख बन्न सफल भएका हुन् ।

मन्त्रिपरिषद्को सोमबार बसेको बैठकले प्रहरी अतिरिक्त महानिरीक्षक (एआईजी) थापालाई आईजीपीमा बढुवा गर्ने निर्णय लिएको हो । आईजीपी वसन्तबहादुर कुँवर सोमबार राति १२ बजेपछि अवकाशमा जाँदैछन् ।

उनी अवकाशमा जानुअघि नै सरकारले थापालाई नेपाल प्रहरीको प्रमुख बनाएको हो । उनीसँगै एआईजीहरु सुदीप गिरी र टेकबहादुर तामाङ आईजीपीको प्रतिस्पर्धामा थिए । तर, सरकारले पहिलो नम्बरमै रहेका थापालाई नेपाल प्रहरीको नेतृत्व जिम्मा लगाएको हो ।
आईजीपीका लागि गिरी र तामाङले पनि अन्तिम समयसम्म कसरत गरिरहे । तर, उनीहरुको केही सीप लागेन । थापाले उछिने । उनी नेपाल प्रहरीको केन्द्रीय अनुसन्धान ब्युरो (सीआईबी)को प्रमुख थिए ।

थापा भक्तपुरका बासिन्दा हुन् । प्रहरी सेवामा प्रवेश गर्नुअघि शिक्षण पेशामा आबद्ध थिए । २०४८ सालमा शिक्षा सेवा आयोगको परीक्षा दिएका उनले निमावि शिक्षकमा नाम निकालेका थिए । कन्या मावि भक्तपुरमा पनि उनले पढाए ।

प्रहरी निरीक्षक (इन्स्पेक्टर)मा २०५० साल मंसिर १० गते आवेदन खुलेपछि उनले दरखास्त दिए । सोही बेला आईजीपी कुँवरले पनि आवेदन दिएका थिए । त्यतिबेला इन्स्पेक्टरमा ६० जनाको नाम निस्किएको थियो ।

तर, सरकारले ५२ जनालाई मात्रै नियुक्त गर्यो । ८ जनाले ६ महिनापछि २०५२ साल भदौ १९ गते नियुक्ति पाए । त्यो नियुक्त पाउनेमा थापा पनि हुन् । ६ महिना ढिलो इन्स्पेक्टरको नियुक्ति पाउँदा सँगै आवेदन दिएका कुँवरलाई बिदाइ गर्ने अवसर थापाले पाए । उनलाई बिदा गर्दै आफू नेपाल प्रहरीको नेतृत्व सम्हाल्ने ठाउँमा पुगे ।

प्रहरी प्रधान कार्यालयले पनि कुँवरको बिदाइ गरिसकेको छ । थापाले अब ६ महिनासम्म नेपाल प्रहरीको नेतृत्व गर्ने छन् । प्रहरी सेवामा प्रवेश गरेपछि उनले इलाका प्रहरी कार्यालय, साँगा, बुटवल र रौतहटको गरुढामा नेतृत्व गर्ने अवसर पाएका थिए ।

थापा २०६३ भदौ ८ गते डीएसपी (प्रहरी नायव उपरीक्षक)मा बढुवा भएका थिए । डीएसपी हुँदा प्रहरी वृत्त, महाराजगञ्ज, जिल्ला प्रहरी कार्यालयहरु रुकुम, खोटाङ, सुनसरी, मोरङ, मकवानपुर र चितवनमा काम गर्ने अनुभव उनीसँग छ ।

उनी २०७२ साउन ८ गते एसपी (प्रहरी उपरीक्षक)मा बढुवा भए । बुटवल तालिम केन्द्र र प्रहरी प्रशिक्षण प्रतिष्ठान महाराजगञ्जमा समेत काम गरिसकेका थापासँग अख्तियार दुरुपयोग अनुसन्धान आयोगको सुर्खेत र बुटवल कार्यालयको प्रमुख भएर काम गरेको अनुभव छ ।

२०७५ फागुन ६ गते एसएसपी (प्रहरी वरिष्ठ उपरीक्षक)मा बढुवा भएका थापाले उपत्यका अपराध अनुसन्धान कार्यालयसमेत काम गरे । थापा २०७९ असार १७ गते डीआईजी (प्रहरी नायव महानिरीक्षक)मा बढुवा भए । डीआईजी हुँदा बागमती प्रदेश प्रहरी प्रमुखको जिम्मेवारीसमेत सम्हाले ।

उनले प्रबन्ध निर्देशनालय, प्रशासन विभाग र उपत्यका प्रहरी कार्यालयमा समेत नेतृत्वदायी भूमिका रहेर काम गरिसकेका छन् । उनी २०७९ चैत ६ गते एआईजी (प्रहरी अतिरिक्त महानिरीक्षक)मा बढुवा भएका थिए ।

प्रहरीको ३० बर्से सेवा अवधि नहटे थापा ६ महिनापछि अनिवार्य अवकाशमा जानेछन् । संसद्‌मा प्रहरी ऐनको प्रस्तावित विधेयक दर्ता छ । यो अवधिमा विधेयक पारित भए उनले थप ६ महिना प्रहरीको नेतृत्व गर्न पाउनेछन् ।

थापा हक्की स्वभावका अनुभवी प्रहरी अधिकारीमा पर्छन् । उनी इन्स्पेक्टरमा भर्ना भएको ६ महिनापछि माओवादी विद्रोह सुरु भएको थियो । पहिलो पोस्टिङ तत्कालीन सुदूरपश्चिम क्षेत्रीय प्रहरी कार्यालय महेन्द्रनगरमा भयो ।

२०५४ को स्थानीय निर्वाचनमा बैतडी जिल्लामा र त्यसपछि थापाले प्रहरी स्कुल डोटीमा काम गरे । युद्धकालमा रुकुमको मैकोटमा १ वर्ष ‘स्ट्राइकिङ’ टोलीमा बसेर उनले काम गरेका थिए ।

युद्धको समयमा काभ्रेको कात्तिके देउराली र रौतहटमा ३ वर्ष काम गरे । रौतहटको इलाका प्रहरी कार्यालय गरुडामा बस्दा थापा ३ पटक दोहोरो भिडन्तमा परेका प्रहरी अधिकारी हुन्। त्यो भिडन्तमा आफू झन्डै मारिएको उनले बताउने गरेका छन् ।

रुकुम बस्दा आफ्नो टोली २ पटक एम्बुसमा परेको थापाले बताउने गरेका छन् । शान्ति सम्झौतापछि खोटाङ प्रहरी प्रमुखको जिम्मेवारी पाए । २०६४ को पहिलो संविधानसभा निर्वाचन हुँदा खोटाङ प्रहरीको नेतृत्व थापाले गरिरहेका थिए । युद्धकालीन सयममा हरेक दिन चुनौतीपूर्ण समय झेलेका थापा अहिले प्रहरीको सर्वोच्च कमाण्डर बनेका छन् ।

तपाइको प्रतिक्रिया
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
विराटनगरमा राति २ बजेसम्म व्यवसाय खोल्न पाइने, अनुमति प्रक्रिया सुरु
भारतीयका परिवार नै मिलेर नेपालमा लागुऔषध ‘सप्लाई’ : मोरङको रंगेलीबाट बुवा, आमा र छोरा पक्राउ
थाइल्यान्डमा एक भवनमा भीषण आगलागी, ११ जनाको मृत्यु
‘साउदीको अमेजनका गोदाममा नेपालीसहितका श्रमिक शोषणमा’
मोरङमा सेप्टिक ट्यांकीभित्र बालकको शव फेला
© 2024 Muluki Khabar. All Rights Reserved. Design & Develop By: Indesign Media Pvt. Ltd.