
विराटनगर । इलाममा मासुका लागि जिउँदो गोरुको फिला काटेको घटना बाहिर आएको छ ।
इलामको सूर्योदय नगरपालिका- ६ कन्याममा गोठमा बाँधिएको गोरुको फिला काटेको घटना बाहिर आएको हो ।
गोरुको एकापाटा फिलाको भाग काटिएको छ । हड्डीसम्म खुर्किएर करिब चार किलो मासु निकालेर लगेको स्थानिय संचारकर्मी गोपाल गिरीले बताएका छन् ।
गोरु स्थानिय राम राईले पालेका थिए । सो गोरुको यसअघि पनि फिला काटेर लगिएको थियो । घरेलु उपचारपछि निको हुँदै गएको थियो । लामो समयपछि गोरु बिस्तारै तंग्रिदै थियो । तर, फेरि गोरुको फिलाको मासु काटेको उनले बताए । गोरु धनी राई बिहान गोठमा जाँदा गोरु मरिसकेको थियो ।
यसअघि पनि उनको गोठको अर्काे गोरुको फिला काटिएको थियो ।
आफ्नो गोठमा बाँधिएको गोरुको फिला काट्ने क्रम नरोकिएपछि राईले स्थानीय जनप्रतिनिधि, प्रहरीलाई बोलाएर कारबाहीको लागि अनुरोध गरेका थिए ।

























