
काठमाडौं । यसवर्षको वसन्तकालीन यामको हिमाल आरोहणका लागि नेपालसहित विभिन्न २४ देशका आरोहीले अनुमति लिएका छन् ।
यसवर्षको आरोहण अनुमति दिन थालिएसँगै अन्नपूर्ण–१ सहित विभिन्न हिमाल आरोहणका लागि ८ आरोही समूहका १८ महिला र ४० पुरुषसहित ५८ जनाले आरोहण अनुमति पाएका हुन् । पर्यटन विभागका निर्देशक लीलाधर अवस्थीका अनुसार वसन्त यामको हिमाल आरोहणका लागि अनुमति दिन सुरु छ ।
विश्वकै सर्वोच्च शिखर सगरमाथा आरोहणका लागि पनि अनुमति दिने तयारी भइरहेको उनले बताए । सगरमाथा आधार शिविरमा अहिले स्नो होराइजन, पायोनियर, सेभेनसमिट ट्रेक, सेभेन समिट क्लब, एलिट एक्सिपीडिसन, हिमालयन गाइड्स, एसियन ट्रेकिङलगायत कम्पनीले शिविर व्यवस्थापनलगायतको काम गरिरहेका छन्।
वसन्त ऋतु सगरमाथासहितका हिमाल आरोहणका लागि उपयुक्त मौसम मानिन्छ। सगरमाथा आरोहणका लागि ठूलो संख्यामा विदेशी पर्यटक आउने गरेका छन् ।
सगरमाथा प्रदूषण नियन्त्रण समिति (एसपीसीसी)ले वसन्त ऋतुको सगरमाथा आरोहणका लागि बाटो बनाउन ‘आइसफल डाक्टर’ खटाएको छ। सगरमाथाको आधार शिविरदेखि दोस्रो शिविरसम्म बाटो बनाउन एसपीसीसीले १० जनाको टोली परिचालन गरेको हो ।
वसन्त ऋतुको सगरमाथा र ल्होत्से हिमाल आरोहणका लागि आरोही केही दिनअघि सगरमाथा गएका छन् । सन् २०२५ को वसन्त ऋतुमा सगरमाथा, ल्होत्से र आमादब्लम हिमाल आरोहणका लागि रोप फिक्सिङको व्यवस्थापकीय जिम्मेवारी एट्के एक्सपिडिसन कम्पनीले पाएको विभागले जनाएको छ ।

























