
विराटनगर । झापाको दमकमा आफ्नै घरबाट लडेर १ जना वृद्धको मृत्यु भएको छ ।
दमक नगरपालिका–५ का ८१ वर्षीय टेकबहादुर गुरुङको मृत्यु भएको झापा प्रहरीका प्रवक्ता डीएसपी खगेन्द्रबहादुर खड्काले जानकारी दिए । आफ्नै अढाई तले पक्की घरको छतबाट खसेर उनको मृत्यु भएको प्रहरीले जनाएको छ ।
उत्तानो परेको अवस्थामा आज (शनिबार) बिहान शव फेला परेको भनेर छोरा विके गुरुङले प्रहरीलाई घटनाको जानकारी दिएका थिए । घरको पूर्वतर्फको खाली ठाउँमा बिहान ५ बजेतिर शव फेला परेको हो ।
इलाका प्रहरी कार्यालय दमकका डीएसपी रामप्रसाद तिमल्सिनाको नेतृत्वमा खटिएको टोलीले कानुनी प्रक्रिया पूरा गरी शवलाई पोस्टमार्टमका लागि दमक अस्पताल पठाएको छ । डीएसपी तिमल्सिनाकै टोलीले घटनाको थप अनुसन्धान गरिरहेको छ ।

























