
काठमाडौं । नेपाल विद्युत प्राधिकरणको कार्यकारी निर्देशकबाट बर्खास्तमा परेका कुलमान घिसिङको मुद्दाको पेसी प्रधान न्यायाधीशसहितको इजलासमा परेको छ ।
घिसिङले सर्वोच्च अदालतमा रिट दायर गरेका थिए । उक्त मुद्दाको पेसी प्रधान न्यायाधीश प्रकाशमान सिंह राउत र न्यायाधीश शारंगा सुवेदीको इजलासमा परेको हो ।
उक्त इजलासले कुलमानले माग गरेअनुसार अन्तरिम आदेश दिने वा नदिने भन्नेबारे आदेश गर्ने छ । यसअघि गत शुक्रबार सर्वोच्चका न्यायाधीश अजिज मुसलमानको इजलासले अन्तरिम आदेशका लागि दुवै पक्षलाई छलफलमा बोलाउने आदेश गरेको थियो ।
इजलासले कुलमान घिसिङलाई पदमुक्त गर्ने निर्णयसँग सम्बन्धित मुद्दाको मिसिल पनि पेस गर्नसमेत आदेश दिएको थियो । यो मुद्दालाई अग्राधिकारमा राख्न पनि भनिएको थियो ।
आफूलाई पदमा निरन्तर कायम राख्नुपर्ने, कुलमानलाई जिम्मेवारी दिन नहुने माग राखी नवनियुक्त कार्यकारी निर्देशक हितेन्द्रदेव शाक्यले पनि सर्वोच्चमा रिट दायर गरेका थिए । न्यायाधीश मुसलमानकै इजलासले हितेन्द्रको मुद्दालाई पनि छलफलका लागि राखेको छ । त्यो मुद्दा पनि कुलमानको सँगै प्रधान न्यायाधीश राउत र न्यायाधीश सुवेदीको इजलासमा परेको छ ।

























