
विराटनगर । झापामा ट्याक्टरबाट खसेर बुधबार साँझ १ जनाको मृत्यु भएको छ । झापा गाउँपालिका–३ स्थित भित्री पक्की सडक खण्डमा दुर्घटना भएको हो ।
झापा प्रहरीका प्रवक्ता डीएसपी खगेन्द्रबहादुर खड्काका अनुसार झाटीबाट कामाटोलीतर्फ जाँदै गरेको मे १ त ४१०७ नम्बरको ट्याक्टरबाट खसेर झापा–३ का ६० वर्षीय रमेश हस्दाको मृत्यु भएको हो । ‘लिफ्ट’ मागेर ट्याक्टरमा चढेका उनी अपरान्ह ४ः३० बजेतिर बेहोस भएर खसेका थिए ।
गम्भीर घाइते भएका हस्दालाई प्राथमिक उपचारका लागि स्वास्थ्य चौकी शरणामती पठाइयो । थप उपचारका लागि प्रादेशिक अस्पताल भद्रपुर पठाइएकोमा साँझ ६ः३० बजेतिर मृत्यु भएको डीएसपी खड्काले बताए । ट्याक्टर र चालक झापा–३ का ४८ वर्षीय देवकुमार गणेशलाई नियन्त्रणमा लिएर प्रहरीले घटनाको अनुसन्धान सुरु गरेको छ ।

























