
खोटाङ । खोटाङको रावाबेसी गाउँपालिकाका कर्मचारी आज (सोमबार) मृत भेटिएका छन् । रावाबेसी–१ कुभिण्डे घर भएका ५७ वर्षीय महेश रेग्मी मृत फेला परेको प्रहरीले जनाएको छ ।
रेग्मी गाउँपालिकाका कार्यालय सहयोगी हुन् । घरनजिकै रहेको बारीको भित्तामा उनको शव फेला परेको थियो । वडाध्यक्ष गेहेन्द्रमान राईका अनुसार रेग्मी गोरेटो बाटोबाट करिब ८–९ मिटर तल बारीको भित्तामा टाउको तल, खुट्टामाथि परेको अवस्थामा मृत भेटिएका थिए ।
गोरेटो बाटोबाट लडेर रेग्मीको मृत्यु भएको हुनसक्ने अनुमान गरिएको छ । जिल्ला प्रहरी कार्यालय खोटाङका इन्स्पेक्टर सुशान्त मिश्रले शवलाई पोस्टमार्टमका लागि जिल्ला अस्पताल दिक्तेल पठाएर घटनाको अनुसन्धान सुरु गरिएको जानकारी दिए ।
तत्कालीन कृषि विकास कार्यालय खोटाङमा कार्यरत रेग्मीको समायोजनका क्रममा रावाबेसी गाउँपालिकामा समायोजन भएको हो । मृतक रेग्मीले १ वर्ष ४ महिनापछि अनिवार्य अवकाश पाउँदै थिए ।

























