
काठमाडौं । गैरआवासीय नेपाली संघ (एनआरएनए)को एकता महाधिवेशनको तयारी थालिएको छ ।
एनआरएनए उच्चस्स्तरीय समितिले सोमबार पत्रकार सम्मेलन गरेर वैशाख २० देखि २२ गतेसम्म काठमाडौंमा महाधिवेशन हुने जानकारी दिएको छ । समितिका संयोजक डा. शेष घलेले लामो समयदेखि विवादमा अल्झिएको संघलाई एकताबद्ध गर्दै महाधिवेशनबाट समस्या समाधानको प्रयत्न गरिने जानकारी दिए ।
विवादरहित संंस्था बनाउन सर्वोच्चले दिएको परामदेशका आधारमा संस्थालाई आवश्यक सुधार गर्न महाधिवेशन हुन लागेको उनको भनाइ छ । निष्पक्षताका लागि महाधिवेशन गरेर नयाँ ढंगले एनआरएनएलाई अघि बढाइने घलेको भनाइ छ ।
महाधिवेशनमा बढीभन्दा बढी एनआरएनको सहभागिता गराइने छ । निःशुल्क सदस्यताको व्यवस्था गर्नुका साथै सदस्यताका लागि आवेदन दिने मिति पटकपटक थप गरिएको उनले बताए ।
एकता महाधिवेशन उच्चस्तरीय मूल समितिका सदस्यसचिव रविना थापाले एनआरएनए उच्चस्तरीय समितिको वेभसाइटमा १६ हजारभन्दा बढीले सदस्यताका लागि आवेदन दिएको बताइन् ।
हालसम्म ६३ हजारभन्दा बढी सदस्य बनिसकेको उनको भनाइ छ । एकता महाधिवेशनमा प्रतिनिधिको रूपमा सहभागी हुन आइतबारसम्म २ हजार ५ सयभन्दा बढीले निवेदन दिइसकेका छन् । आवेदनको समय मंगलबारसम्म तोकिएको छ ।
थापाले सन् २००३ मा स्थापना गरिएको एनआरएनए अहिले एउटा महत्वपूर्ण मोडमा आइपुगेको उल्लेख गरिन् । यस अवधिमा नेपालमा लगानी बढाउने, नेपाल सरकारसँग निकट सम्पर्कमा रही प्रवासमा रहेका गैरआवासीय नेपालीको हकहित संरक्षण गर्नेदेखि अन्य सामाजिक कल्याणकारी काम गरिएको उनको भनाइ छ ।
संघले कानुनी सर्वोच्चताको पालना गर्दै खुला छलफल, वार्ता र संवादको माध्यमबाट संस्थालाई एकजुट बनाउन र तोकिएको मितिमा एकता महाधिवेशन सफल बनाउन आह्वान गरेको छ ।
सदस्यसचिव थापाले एकता महाधिवेशन आयोजना गर्नका लागि विभिन्न उपसमिति गठन गरी तयारी तीव्र पारिएको बताइन् । हालसम्म १४ पटक उच्चस्तरीय समितिको बैठक बसिसकेको छ । बैठकमा नेपाल सरकारका प्रतिनिधिहरू समेत सहभागी भएका थिए ।

























