
विराटनगर । सुनसरीको इटहरी र भोजपुरको षडानन्दमा दुर्घटना हुँदा बालकसहित २ जनाको मृत्यु भएको छ । इटहरीमा ईभी स्कुटर र षडानन्दमा ट्याक्टर दुर्घटना भएको हो ।
कोशी लोकमार्गअन्तर्गत इटहरी उपमहानगरपालिका–१० मा नम्बर नभएको ईभी स्कुटर डिभाईडरमा ठोक्किएर दुर्घटना हुँदा चालकको मृत्यु भएको छ । इहटरीबाट विराटनगरतर्फ आउँदै गरेको स्कुटर आफैं अनियन्त्रित भएर मंगलबार साँझ ७ः४० बजेतिर दुर्घटनामा परेको प्रहरीले जनाएको छ ।
दुर्घटनामा परेर ईभी स्कुटरका चालकको मृत्यु भएको छ । गम्भीर घाइते भएका चालकलाई उपचारका लागि मोरङको बूढीगंगास्थित विराट शिक्षण अस्पताल ल्याइएको थियो । अस्पताल पुर्याउनसाथ चिकित्सकले मृत घोषित गरिदिएका हुन् ।
अन्दाजी ३० वर्षीय मृतकको पहिचान खुलेको छैन । पहिचानको प्रयास भइरहेको प्रहरीले जनाएको छ । स्कुटरको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको छ ।
त्यस्तै, भोजपुरको षडानन्द नगरपालिका–१४ मा को २ त ८६९७ नम्बरको ट्याक्टरले किचेर ८ वर्षीय बालकको मृत्यु भएको छ । सडकको छेउमा पार्किङ गरेर चालक खाना खान गएका बेला बालकले खेल्ने क्रममा मंगलबार दिउँसो १ः३५ बजेतिर ट्याक्टर दुर्घटना भएको प्रहरीको भनाइ छ ।
बालकले खेल्ने क्रममा अगाडि बढेको ट्याक्टर सडकबाट करिब १५ मिटर तल खसेको थियो । ट्याक्टरले किचेर षडानन्द–१२ का विकाश कार्कीका छोरा ८ वर्षीय सौगात कार्कीको घटनास्थलमै मृत्यु भएको प्रहरीले जनाएको छ ।
दुर्घटनालगत्तै ट्याक्टर चालक षडानन्द–१२ का २२ वर्षीय भुवन भट्टराई फरार बनेका छन् । प्रहरीले उनको खोजी गरिरहेको छ । चालकको लापरबाहीले ट्याक्टर दुर्घटना भएको प्रहरीले उल्लेख गरेको छ ।

























