‘बिमाको नाममा सरकारी अस्पताल कमजोर बनाउने खेल भयो’

विराटनगर । स्वास्थ्य बिमा बोर्डले विराटनगरको कोशी अस्पताललाई रेफरल सेन्टर मात्रै बनाएपछि प्रतिनिधिसभा बैठमा मोरङ क्षेत्र नम्बर ४ का सांसद अमनलाल मोदीले आपत्ति जनाएका छन् । सोमबार प्रतिनिधिसभाको बैठकमा शून्य समयमा बोल्दै उनले आपत्ती जनाएका हुन् ।

निजी अस्पताललाई पोस्ने गरी प्रथम सेवा बिन्दु र रेफरल सेन्टर दुवै रहेको कोशी अस्पताल र बिपी कोइराला स्वास्थ्य विज्ञान प्रतिष्ठानलाई धाराशायी बनाउने गरी रेफरल सेन्टर मात्रै तोकिएको उनले बताए ।

Advertisement

सरकारको निर्णयले कोशी र बीपी प्रतिष्ठानमा स्वास्थ्य बिमाका बिरामीले जानुअघि पालिका स्तरका अस्पतालबाट रेफर लिनुपर्नेछ ।

‘धेरै पालिकाहरूसँग त्यो स्तरको अस्पताल छैन, यो निर्णयले कोशी अस्पतालले मात्र दैनिक एक हजार बिरामी गुमाउनुपर्ने अवस्था आउनेछ।’ उनले भने ।

पालिका स्तरको अस्पतालबाट रेफर लिएर निजी अस्पतालमा जाने बढी हुने बताउँदै उनले सरकारी अस्पतालहरूलाई कमजोर बनाएर निजी अस्पतालहरूलाई फाइदा पुर्याउने काम नगर्न आग्रह गरे । सांसद मोदीले यो निर्णय स्वास्थ्य क्षेत्रका बिचौलीयाहरूको प्रभावमा आएको आरोप समेत लगाए । उनले स्वास्थ्य बिमा बोर्डको निर्णय खारेज गरी पूर्ववत् रूपमा अस्पतालहरूलाई प्रथम सेवा विन्दुको सुविधा दिने वातावरण बनाउन माग गरे ।