स्रष्टा समाज कोशी प्रदेश अध्यक्षमा मार्सेली चयन 

विराटनगर । सामाजिक अभियन्ता तथा लेखक कृष्णप्रसाद भण्डारी ‘मार्सेली’ को अध्यक्षतामा नेपाल स्रष्टा समाज कोशी प्रदेशको पुनर्गठन गरिएको छ । विराटनगरमा सम्पन्न प्रथम साधारणसभाबाट मार्सेलीको नेतृत्वमा ११ सदस्यीय नयाँ कार्य समिति चयन गरिएको हो । 

स्रष्टा समाजका केन्द्रीय अध्यक्ष वरिष्ठ साहित्यकार श्रीओम श्रेष्ठ ‘रोदन’ को प्रमुख आतिथ्यता भएको साधारणसभाले साहित्यकार लक्ष्मी पोखरेललाई सचिव र बाबुराम पोखरेललाई कोषाध्यक्षमा चयन गरेको छ । 

त्यस्तै, कवि हरि कट्टेल, प्रयाग न्यौपाने, मीनकुमार नवोदित, निर्मला कोइराला, पुष्पा सायरा, शारदा भट्टराई, सुजाता राई र निर्मला नेपाल सदस्यमा छानिएका छन् । प्रथम साधारणसभाले पदाधिकारीसहित सबै सदस्यलाई निर्विरोध चयन गरेको हो । 

सोही अवसरमा साहित्यकार गोकुल व्याकुलको ‘जीवन, संघर्ष र मृत्यु’ आत्मसंस्मरण लोकार्पण गरिएको थियो । लोकार्पित आत्मसंस्मरणमाथि अग्रज समालोचक भूषण ढुंगेलले समीक्षा गरेका थिए । 

प्रमुख अतिथि श्रीओम श्रेष्ठ रोदन, पुस्तकका लेखक गोकुल व्याकुल, अग्रज साहित्यकार विवश पोखरेल, हरिहर भण्डारी, सरला चापागाईं, कवि हरि कट्टेल, स्रष्टा समाजका केन्द्रीय सदस्य प्रदीप सापकोटालगायतले शुभकामना व्यक्त गरे । 

समाजको पहिलो बैठकले साहित्यकार विवश पोखरेल, गंगा सुवेदी, बलराम पोखरेल, दिङ्लाली कान्छो, सरला चापागाईं, कविराज न्यौपाने र केशु विरहीलाई सल्लाहकारमा चयन गरेको अध्यक्ष मार्सेलीले जानकारी दिए ।