फाइल फोटो ।उदयपुर । उदयपुरको चौदण्डीगढी नगरपालिका–३ बाट ७ सय ६३ किलो ७ सय ग्राम गाँजा बरामद भएको छ ।
को १ ज ३४५६ नम्बरको बोलेरो गाडीमा गाँजा फेला फरेको हो । गाँजा लोड गरिएको गाडीलाई नियन्त्रणमा लिएको प्रहरीले २ जनालाई पक्राउ गरेको छ । राति १२ः३० बजेतिर इलाका प्रहरी कार्यालय बेल्टार र लागुऔषध नियन्त्रण ब्यूरो विराटनगरबाट खटिएको संयुक्त टोलीले चेकजाँच गर्दा बोलेरो गाडीमा गाँजा फेला परेको हो ।
चैदण्डीगढी–३ पैतालिस चोकबाट गाईघाटतर्फ जाँदै गरेको बोलेरोलाई रोकेर प्रहरीले खानतलासी गरेको थियो । त्यस क्रममा बोलेरोभित्र ३० वटा बोरामा प्याक गरेर राखेको अवस्थामा ७ सय ६३ किलो ७ सय ग्राम गाँजा भेटिएको प्रहरीले जनाएको छ ।
बोलेरोमा गाँजा फेला परेपछि प्रहरीले चालक बेलका नगरपालिका–६ का रविनकुमार राई र बोलेरोमा सवार बेलका नगरपालिका–९ का रामबहादुर राईलाई पक्राउ गरेको छ । प्रहरीले गाँजा बरामद गर्दै गाडी नियन्त्रणमा लिएर २ जनालाई पक्राउ गरी थप अनुसन्धान सुरु गरेको छ ।

























