
काठमाडौँ । अमेरिका र भेनेजुएलाबीच बढ्दो तनाव र विकसित पछिल्ला घटनाक्रमप्रति नेपाल सरकारले आफ्नो आधिकारिक धारणा सार्वजनिक गर्दै गम्भीर चासो व्यक्त गरेको छ।
परराष्ट्र मन्त्रालयले बुधबार एक विज्ञप्ति जारी गर्दै दुवै पक्षलाई अधिकतम संयमता अपनाउन र परिस्थिति थप चर्किन सक्ने कुनै पनि कदम नचाल्न आग्रह गरेको हो। अमेरिकी सेनाले भेनेजुएलाका राष्ट्रपति दम्पतीलाई नियन्त्रणमा लिएर न्युयोर्क पुर्याएपछि उब्जिएको वैश्विक तरंगका बीच नेपालको यस्तो धारणा आएको हो।
संयुक्त राष्ट्रसंघको बडापत्रअनुसार प्रत्येक राष्ट्रको सार्वभौमिकता, भौगोलिक अखण्डता र राजनीतिक स्वतन्त्रताको पूर्ण सम्मान हुनुपर्नेमा नेपालले दृढताका साथ जोड दिएको छ। नेपालले जुनसुकै जटिल विवादको समाधान पनि सैन्य बलबाट नभई संवाद, कूटनीति र आपसी समझदारीमार्फत शान्तिपूर्ण रूपमा गरिनुपर्ने बताएको छ।
तनावले क्षेत्रीय र विश्व शान्तिमा खलल पुर्याउन सक्ने भन्दै उत्तेजित नहुन सम्बन्धित पक्षहरूलाई सचेत गराइएको छ।विश्वका विभिन्न मुलुकहरूले यस घटनालाई लिएर चिन्ता व्यक्त गरिरहेका बेला नेपालले पनि असंलग्न परराष्ट्र नीतिको मर्म अनुरूप आफ्नो अडान स्पष्ट पारेको छ।

























