
विराटनगर । कोशी प्रदेशका नवनियुक्त आन्तरिक मामिला तथा कानुन मन्त्री इन्द्रमणि पराजुलीले बिहीबार पदभार ग्रहण गरेका छन्। मन्त्रालयमा आयोजित एक कार्यक्रमका बीच कार्यभार सम्हाल्दै मन्त्री पराजुलीले आफ्नो कार्यकालमा सुशासनलाई मुख्य प्राथमिकतामा राख्ने उद्घोष गरेका हुन्।
पदभार ग्रहणपछि कर्मचारीहरूलाई निर्देशन दिँदै मन्त्री पराजुलीले प्रदेशमा शान्ति सुरक्षाको प्रत्याभूति गराउन र कानुनको कार्यान्वयनलाई प्रभावकारी बनाउन आफू प्रतिबद्ध रहेको बताए। उनले जनअपेक्षा अनुसारका कामहरू छिटो र छरितो रूपमा सम्पन्न गर्न कर्मचारीहरूलाई सक्रिय भएर लाग्न आग्रह समेत गरे।
प्रदेश सरकारको महत्त्वपूर्ण मन्त्रालयको जिम्मेवारी पाएका पराजुलीले मन्त्रालय मातहतका कामकारबाहीलाई थप व्यवस्थित र पारदर्शी बनाउँदै नागरिकले महसुस गर्ने गरी सुशासन कायम गर्ने प्रतिबद्धता व्यक्त गरेका छन्। कार्यक्रममा मन्त्रालयका सचिव र उच्च पदस्थ कर्मचारीहरूले उनलाई स्वागत गर्दै मन्त्रालयको वर्तमान अवस्थाबारे जानकारी गराएका थिए।

























