
काठमाडौँ । पछिल्लो समय ‘जेनजी’ आन्दोलनका अगुवाका रूपमा चिनिएका सुदन गुरुङले आगामी प्रतिनिधिसभा निर्वाचनमा उम्मेदवारी दिने घोषणा गरेका छन्। शुक्रबार सामाजिक सञ्जाल फेसबुकमार्फत उनले आफ्नो गृह जिल्ला गोरखाको क्षेत्र नम्बर १ बाट चुनाव लड्ने औपचारिक जानकारी दिएका हुन्।
आफ्नो उम्मेदवारीबारे प्रष्ट पार्दै गुरुङले सामाजिक सञ्जालमा लेखेका छन्, ‘आफ्नै गाउँ, आफ्नै माटोबाट परिवर्तनको सुरुवात; नयाँ शक्ति, नयाँ अनुहार, नयाँ नेपाल।’ उनले आफ्नो उम्मेदवारीलाई देशमा नयाँ राजनीतिक लहरको सुरुवातका रूपमा प्रस्तुत गर्न खोजेका छन्।
पछिल्लो समय राष्ट्रिय स्वतन्त्र पार्टी (रास्वपा) सँग नजिक देखिएका गुरुङले आफ्नो उम्मेदवारी स्वतन्त्र रहने वा कुनै दलबाट हुने भन्नेबारे भने अझै खुलाएका छैनन्। फागुन २१ गते हुने निर्वाचनका लागि उनको यो घोषणालाई नयाँ पुस्ताको राजनीतिक सक्रियताका रूपमा हेरिएको छ।

























