
काठमाडौँ । प्रधानन्यायाधीश प्रकाशमान सिंह राउत विगत तीन दिनदेखि बलम्बुस्थित सशस्त्र प्रहरी अस्पतालमा उपचाररत छन्। गत सोमबार स्वास्थ्यमा समस्या देखिएपछि उनलाई अस्पताल भर्ना गरिएको हो।
अस्पताल स्रोतका अनुसार प्रधानन्यायाधीश राउतलाई उच्च ज्वरो र पेट दुख्ने समस्या देखिएको छ। उपचारमा संलग्न चिकित्सकहरूले उनको शरीरमा अक्सिजनको लेभल समेत कम भएको जानकारी दिएका छन्।
आज अस्पताल भर्ना भएको तेस्रो दिन पुग्दा पनि उनको स्वास्थ्यमा पूर्ण सुधार नभइसकेकाले चिकित्सकहरूको निगरानीमा राखिएको छ। अस्पतालका एक अधिकारीका अनुसार, स्वास्थ्य अवस्थालाई मध्यनजर गर्दै उनलाई अझै केही दिन अस्पतालमै राखेर उपचार प्रक्रिया अगाडि बढाइनेछ। प्रधानन्यायाधीश राउतको उपचारका लागि अस्पतालले विशेषज्ञ चिकित्सकहरूको टोली खटाएको छ।

























