
काठमाडौँ। निर्वाचन आयोगले फागुन २१ को प्रतिनिधिसभा निर्वाचनका लागि दर्ता उम्मेदवारको अन्तिम नामावली माघ ९ गते प्रकाशन गर्ने भएको छ। माघ ६ मा भएको मनोनयन दर्तामा देशभरबाट २३५२ पुरुष र ३०३ महिला गरी कूल २६५५ जनाको उम्मेदवारी परेको छ। आयोगको तालिका अनुसार माघ ७ मा उजुरी लिने, ८ मा जाँचबुझ गरी नामावली प्रकाशन गर्ने र ९ गते नाम फिर्ता लिने समय तोकिएको छ। सोही दिन उम्मेदवारलाई निर्वाचन चिह्न प्रदान गरिनेछ।
यसैबीच, सर्वोच्च अदालतले नेपाली कांग्रेसको आधिकारिकता विवादमा अन्तरिम आदेश दिन अस्वीकार गरेको छ। न्यायाधीश सुनिलकुमार पोखरेलको इजलासले देउवा पक्षको माग अनुसार आदेश जारी नगरेपछि गगन थापा नेतृत्वको समितिलाई चुनावमा जाने बाटो खुलेको छ।
थापाकै हस्ताक्षरमा कांग्रेस उम्मेदवारले देशभर मनोनयन दर्ता गरेका छन्। यस्तै, एमालेले १६५ वटै क्षेत्रमा मनोनयन दर्ता गरेको छ, जसमा ५४.५४ प्रतिशत नयाँ अनुहार छन्। अध्यक्ष केपी शर्मा ओलीले झापा–५ बाट उम्मेदवारी दिएका छन्।

























