
बैतडी । सुदूरपश्चिम प्रदेशका पहाडी तथा हिमाली जिल्लामा शुक्रबार बेलुकादेखि हिमपातसहित हिउँदे वर्षा सुरु भएको छ ।
लामो समयदेखि वर्षा नहुँदा सुक्खा बढ्दै गएको यस क्षेत्रमा भएको वर्षा र हिमपातले मौसममा उल्लेखनीय परिवर्तन ल्याएको छ । कृषकहरूमा आशा जगाएको छ ।
बैतडी जिल्लाका उच्च लेकाली भेगहरू खोड्पे, श्रीभावर, ढोल्यामोड, मुस्याचोर, सतबाँझ र देहिमाडौँ आसपासका क्षेत्रमा बाक्लो हिमपात भएको जिल्ला प्रहरी कार्यालय बैतडीले जनाएको छ । इन्स्पेक्टर सुरज सिंहका अनुसार वर्षासँगै हिमपात भए पनि हालसम्म मुख्य राजमार्ग र सहायक सडकहरूमा यातायात अवरुद्ध हुने खालको समस्या देखिएको छैन ।
प्रहरी र स्थानीय तहले सडक अवस्थाको निरन्तर अनुगमन गरिरहेको बताएका छन् । यसैगरी दार्चुला जिल्लाको व्यास क्षेत्र र अपिहिमाल आसपासका उच्च भूभागमा पनि हिमपात भएको छ ।
अपिहिमाल क्षेत्रको लेकाली भेग सेताम्मे बनेको स्थानीयले बताएका छन् । डडेल्धुरा जिल्लामा सदरमुकामसहित हगुल्टे, साहुखर्क र भातकाँडा क्षेत्रमा हिमपात भएको छ । कतिपय स्थानमा वर्षा र हिमपात एकैसाथ हुँदा चिसो निकै बढेको छ ।
यो वर्ष सुदूरपश्चिममा पहिलोपटक उल्लेखनीय हिउँदे वर्षा र हिमपात भएको हो । गएको ४ महिनाभन्दा बढी समयसम्म वर्षा नहुँदा गहुँ, जौ, तोरीलगायतका हिउँदे बाली सुक्दै जाने अवस्थामा पुगेका थिए ।
पानीको अभावका कारण बाली राम्रोसँग उम्रन नसक्ने चिन्तामा रहेका किसानहरू वर्षा र हिमपातपछि बाली सप्रिने आशामा खुसी देखिएका छन् । कृषकहरूले यो वर्षा गहुँबालीका लागि विशेष लाभदायी हुने अपेक्षा गरेका छन् ।
हिमपात र वर्षासँगै प्रदेशका पहाडी तथा हिमाली क्षेत्रमा चिसोको प्रभाव अत्यधिक बढेको छ । बिहान र साँझको समयमा चिसो हावाका कारण दैनिक जनजीवन प्रभावित हुन थालेको छ ।
स्वास्थ्यकर्मीहरूले अत्यधिक चिसोबाट जोगिन न्यानो लुगा प्रयोग गर्न, बालबालिका र ज्येष्ठ नागरिकलाई विशेष ध्यान दिन र अनावश्यक रूपमा चिसोमा नबस्न आग्रह गरेका छन् । मौसमविद्हरूका अनुसार केही दिनसम्म सुदूरपश्चिमका उच्च भू–भागमा मौसम बदली रहने छ ।
छिटपुट वर्षा तथा हिमपातको सम्भावना कायमै रहने पूर्वानुमान गरिएको छ । स्थानीय प्रशासनले हिमपातका कारण सम्भावित जोखिमलाई ध्यानमा राख्दै सतर्क रहन आग्रह गरेको छ ।

























