
इनरुवा । सुनसरीको इनरुवामा प्रहरीले ठुलो परिमाणमा अवैध लागू औषध गाँजासहित दुई जनालाई नियन्त्रणमा लिएको छ। पूर्व-पश्चिम सडक खण्डको भोटेपुलमा सवारी चेकजाँचका क्रममा ९९.१ किलोग्राम गाँजा बरामद भएको हो।
अस्थायी प्रहरी पोष्ट सखुवागाछीबाट खटिएको टोलीले पूर्वबाट पश्चिम जाँदै गरेको को २ ह ६१२५ नम्बरको अटोलाई रोक्न खोजेको थियो। तर, अटो नरोकी भागेपछि प्रहरीले पिछा गरेको थियो। पछि अस्थायी प्रहरी पोष्ट बसपार्क इनरुवाको सहयोगमा वडा नं. ४ मा अटोलाई रोकेर चेकजाँच गर्दा उक्त परिमाणको गाँजा फेला परेको प्रहरीले जनाएको छ।
प्रहरीले अटो चालक धनकुटाको चौबिसे गाउँपालिका–७ बस्ने २५ वर्षीय साजन लिम्बु र सोही ठाउँका १९ वर्षीय गगन लिम्बुलाई पक्राउ गरेको छ। बरामद गाँजा र अटो सहित दुवै जनालाई जिल्ला प्रहरी कार्यालय सुनसरीमा राखेर थप अनुसन्धान अघि बढाइएको छ।

























