हिसान स्पोर्ट्स मिट : कान्तिपुर कलेजलाई क्रिकेटको उपाधि 

विराटनगर । विराटनगरमा जारी हिसान स्पोर्ट्स मिटको क्रिकेट खेलको उपाधि कान्तिपुर कलेजले जितेको छ ।
हिसान मोरङले आयोजना गरेको प्रतियोगिताअन्तर्गत शुक्रबार भएको क्रिकेट खेलमा कान्तिपुरले शिक्षादीपलाई ४ विकेटले हराउँदै उपाधि जितेको हो ।

टस जित्दै ब्याटिङ थालेको शिक्षादीपले निर्धारित २० ओभरमा ७ विकेटको क्षतिमा १४६ रनको चुनौती प्रस्तुत गरेको थियो । टेकनारायण मण्डलले २५, सत्यमकुमार सडामले २१ रन, शिवम झाले १९ रन र इरफान आलमले १५ रन बनाए । कान्तिपुरका सन्तोष गुप्ता र सुधीर कामतले २–२ विकेट तथा सीताराम कामत र अरविन्द मण्डलले १–१ विकेट लिए ।

१४७ रनका लक्ष्य पाएको कान्तिपुरले १६ ओभर ४ बलमा ६ विकेट गुमाउँदै विजयी भयो । सोनु दासले ६० र प्लेयर अफ द म्याच सीताराम कामतले ४७ रन बनाए । शिक्षादीपका रोहनकुमार राय  र सुदीप यादवले २–२ विकेट लिए ।

त्यस्तै, फुटबल छात्रातर्फ अर्किड कलेजले जेभियर्स कलेजलाई टाइब्रेकरमा २–१ गोल अन्तरमा हराउँदै फाइनलमा प्रवेश गरेको छ । दुवै टोली गोलरहित बराबरी खेलेपछि खेलको निर्णय टाइब्रेकरबाट भएको हो । प्लेयर अफ म्याच अर्किडकी सुस्मिता बस्नेत भइन्  । अर्को खेलमा रेडस्टारले कान्तिपुरलाई ६–० को गोल अन्तरमा पराजित गर्दै फाइनलमा पुग्यो । प्लेयर अफ म्याच सलिजा राई र सुहाना राईले २–२ गोल तथा स्मृति राई र निशा लिम्बूले १–१ गोल गरे ।

फुटबलकै छात्रतर्फ शिक्षा सन्देशले कान्तिपुरलाई सडनडेथमा ६–५ को गोल अन्तरमा हराउँदै फाइनलमा पुग्यो । निर्धारित समयमा दुवै टिमले १–१ गोलको बराबरी खेलेपछि खेल टाइब्रेकरमा गएको थियो । खेलको प्लेयर अफ द म्याच शिक्षा सन्देशका मनिष भुजेल भए ।

अर्को खेलमा रेडस्टारले भानुलाई २–० गोल अन्तरले पराजित गर्दै फाइनलमा प्रवेश गरेको छ । प्लेयर अफ द म्याच रेडस्टारका सौगात राई र सदानन्द मास्केले १–१ गोल गरे ।

त्यसैगरी, भलिबल छात्रतर्फ राष्ट्रनिर्माण कलेजले बुद्ध कलेजलाई सोझो सेटमा हराउँदै फाइनल पुग्यो । खेलको प्लेयर अफ द म्याच राष्ट्रनिर्माणका चन्द्र श्रेष्ठ भए । अर्को खेलमा कान्तिपुरले बालकल्याण विद्या मन्दिर (बिकेभिएम) लाई १८–२५, २५–२० र २७–२५ को सेटमा हराउँदै फाइनल पुग्यो । खेलको प्लेयर अफ द म्याच कान्तिपुरका कृष थारु भए ।

छात्रातर्फ राष्ट्र निर्माणले अरनिकोलाई सोझो सेटमा हराउँदै फाइनल पुग्यो । खेलको प्लेयर अफ द म्याच राष्ट्र निर्माणकी मनिषा तामाङ भइन् । अर्को खेलमा रेडस्टारले शिक्षादीपलाई सोझो सेटमा पराजित गर्दै फाइनलमा पुग्यो । खेलको प्लेयर अफ द म्याच रेडस्टारकी आश्मा लिम्बू भइन् ।

यसैगरी, कबड्डीको पहिलो खेलमा ग्रिनल्याण्डले अर्किडलाई ४६–४४ को अंकमा हराउँदै फाइनलमा पुगेको छ । खेलको प्लेयर अफ द म्याच ग्रिनल्याण्डका धर्मचन्द्र मेहता भए ।

अर्को खेलमा कान्तिपुरले शिक्षादीपलाई ४६–२७ को अंकमा पराजित गर्दै फाइनलमा पुगेको छ । खेलको प्लेयर अफ द म्याच कान्तिपुरका कपिल मण्डल भए । प्रतियोगिताका सबै फाइनल खेलहरू शनिबार हुने आयोजकले जनाएको छ ।