
सर्लाही । कौडेना गाउँपालिका–३ स्थित पर्सा पोखरी नजिक हुलाकी सडकखण्डमा सोमबार दुई वटा मोटरसाइकल एकापसमा ठोक्किएर दुर्घटना भएको छ। दुर्घटनामा संलग्न बीआर ०६ सिएन ७४४२ नम्बरको मोटरसाइकलबाट ४ किलो ७१० ग्राम गाँजा बरामद भएपछि प्रहरीले अनुसन्धान तीव्र पारेको छ।
दुर्घटनामा अर्को मोटरसाइकलका चालक ३८ वर्षीय हरदास यादव र उनका ७० वर्षीय बुवा अमिन्द्र राय यादव घाइते भएका छन्। उनीहरूको प्रादेशिक अस्पताल मलंगवामा उपचार भइरहेको छ।
गाँजासहितको मोटरसाइकल चालक रवीन्द्र गिरी दुर्घटनालगत्तै फरार भए पनि प्रहरीले उनलाई मलंगवा–१० बाट पक्राउ गरेको छ। गिरीमाथि लागूऔषध ओसारपसार र सवारी दुर्घटना दुवै मुद्दामा थप अनुसन्धान भइरहेको प्रहरीले जनाएको छ।

























