
वीरगन्ज । वीरगन्ज महानगरपालिकाका संवेदनशील क्षेत्रहरूमा लगाइएको कर्फ्यु आदेश पुनः थप गरिएको छ। जिल्ला प्रशासन कार्यालय पर्साले शान्ति सुरक्षाको अवस्था अझै सामान्य भइनसकेको भन्दै कर्फ्युको अवधि बढाएको हो।
मंगलबार दिउँसो एक सूचना जारी गर्दै प्रशासनले आज बेलुका ६ बजेसम्म कर्फ्यु रहने जानकारी गराएको छ। यसअघि आज दिउँसो १ बजेसम्मका लागि लगाइएको कर्फ्युलाई बेलुका ६ बजेसम्म निरन्तरता दिइएको प्रमुख जिल्ला अधिकारी (सीडीओ) भोला दाहालले जानकारी दिए।
सम्भावित अवाञ्छित गतिविधि रोक्न र सार्वजनिक सुरक्षा सुनिश्चित गर्न कर्फ्यु थपिएको प्रशासनको भनाइ छ। सोमबार साँझदेखि सुरु भएको यो कर्फ्यु आदेशलाई सुरक्षा संवेदनशीलताका आधारमा समय बढाउँदै लगिएको छ।
कर्फ्यु अवधिभर तोकिएका क्षेत्रभित्र आवतजावत, भेला, जुलुस, प्रदर्शन, सभा र बैठक लगायतका कुनै पनि गतिविधि गर्न पूर्ण रूपमा निषेध गरिएको छ। प्रशासनले कर्फ्यु आदेशको पूर्ण पालना गर्न नगरबासीलाई आग्रह समेत गरेको छ।

























