टी–२० विश्वकप: न्युजिल्यान्डको विजयी सुरुवात, अफगानिस्तान ५ विकेटले पराजित

Share this
754shares
मुलुकी खबर
मुलुकी खबर
clock२०८२ माघ २५, आइतबार १५:०२

काठमाडौँ। भारत र श्रीलङ्कामा संयुक्त रूपमा आयोजना भइरहेको टी–२० विश्वकप प्रतियोगितामा न्युजिल्यान्डले सुखद सुरुवात गरेको छ। चेन्नईको एमए चिदम्बरम मैदानमा केही बेरअघि सम्पन्न खेलमा न्युजिल्यान्डले अफगानिस्तानलाई ५ विकेटले हराएको हो।

अफगानिस्तानले दिएको १८३ रनको बलियो लक्ष्य न्युजिल्यान्डले १७.५ ओभरमै ५ विकेट गुमाएर पूरा गर्‍यो। न्युजिल्यान्डको जितमा टिम शेफर्टले विष्फोटक ब्याटिङ गरे। उनले ४२ बलमा ७ चौका र ३ छक्का प्रहार गर्दै ६५ रन जोडे। त्यस्तै, ग्लेन फिलिप्सले ४२ र मार्क चापम्यानले २८ रनको योगदान दिए। डेरिल मिचेल २५ र मिचेल सान्टनर १४ रनमा अविजित रहे।

बलिङतर्फ अफगानिस्तानका मुजीब उर रहमानले दुई तथा अजमुतल्लाह ओमारजाइ, राशिद खान र मोहम्मद नाबीले एक–एक विकेट लिए।

यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा ६ विकेट गुमाएर १८२ रन बनाएको थियो। उसका लागि गुलबदिन नइबले आक्रामक अर्धशतकीय पारी खेले। उनले ३५ बलमा ४ छक्का र ३ चौकाको मद्दतले ६३ रन बनाए। यस्तै, सेदिकुल्लाह अटलले २९ र रहमानुल्लह गुरबाजले २७ रन जोडेका थिए।

न्युजिल्यान्डका बलर लोकी फर्ग्युसनले दुई विकेट लिए भने म्याट हेनरी, रचिन रविन्द्र र जेकोब डुफीले एक–एक विकेट हात पारे।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.