रङ्गको उत्सवमा नमिसियोस् राजनीतिक रङ्ग

प्रकृतिले रङ्ग फेरेसँगै आजबाट पहाडी भूभाग र काठमाडौँ उपत्यका होलीको उल्लासमा झुमेको छ। असत्यमाथि सत्यको विजयको प्रतीक मानिने यो फागु पूर्णिमा आफैँमा सामाजिक सद्भाव, भ्रातृत्व र प्रेमको उत्सव हो।

तर, यस वर्षको होली अलि विशेष र संवेदनशील घडीमा आइपुगेको छ। अबको तीन दिनपछि अर्थात् फागुन २१ गते देश प्रतिनिधिसभाको ऐतिहासिक निर्वाचनमा होमिँदै छ।

यतिबेला चुनावी सरगर्मी उत्कर्षमा छ। राजनीतिक दल र उम्मेदवारहरू मत माग्न अन्तिम कसरतमा छन्। निर्वाचन आफैँमा लोकतन्त्रको एउटा ठूलो उत्सव भए पनि यसका आफ्नै सीमा र मर्यादा हुन्छन्।

विशेषगरी आज मध्यरातिदेखि मौन अवधि सुरु हुने भएकाले पनि होलीको रङ्गमा राजनीतिक रङ्ग मिसिने जोखिम उच्च छ। हाम्रो चिन्ता र आग्रह यत्ति हो- रङ्गको यो पवित्र पर्वलाई कुनै पनि बहानामा राजनीतिक दाउपेच वा प्रचारको माध्यम बनाइनु हुँदैन।

मौन अवधिको मूल मर्म भनेको मतदातालाई शान्त र संयमित भएर विवेकपूर्ण निर्णय लिन समय दिनु हो। यस्तो बेला होलीको जमघटलाई चुनावी सभा वा शक्ति प्रदर्शनको रूपमा प्रयोग गर्नु निर्वाचन आचारसंहिताको गम्भीर उल्लङ्घन मात्र होइन, सामाजिक सद्भावमाथि पनि प्रहार हो।

उम्मेदवारहरूले रङ्ग दलेर भोट माग्ने भन्दा पनि यो समयलाई आपसी द्वेष मेटाउने र अहिंसात्मक गतिविधिको प्रवर्द्धन गर्ने अवसरका रूपमा लिनुपर्छ।

हाम्रो समाज बहुलवादी छ। एउटै आँगनमा बसेर रङ्ग साट्ने साथीहरू फरक-फरक राजनीतिक विचारधाराका हुन सक्छन्। निर्वाचनको प्रतिस्पर्धाले कहिलेकाहीँ मनहरूमा दूरी बढाउन सक्छ।

त्यसैले, यो होलीले निर्वाचनका कारण सिर्जित हुन सक्ने कटुतालाई मेटाउन ‘सेफ्टी भल्भ’ को काम गर्नुपर्छ। कोही पनि मतदाता रङ्गको उन्मादमा परेर वा राजनीतिक उक्साहटमा लागेर हिंसात्मक गतिविधिमा संलग्न हुनु हुँदैन।

प्रशासनले पनि उत्सवको बहानामा हुने अवाञ्छित गतिविधि र निर्वाचन विरोधी तत्वहरूमाथि कडा निगरानी राख्न जरुरी छ। होली मनाउँदा अरूको इच्छा र मर्यादाको सम्मान गरौँ।

रङ्गसँगै नागरिक चेतनाको दीप जलाऔँ ताकि तीन दिनपछि हुने मतदानमा हामी स्वच्छ र भयरहित वातावरणमा सहभागी हुन सकौँ। होलीको रङ्गले मनहरू जोडोस्, न कि राजनीतिक विभाजनका रेखाहरू कोरोस्।