अमेरिकासँगको तनावका कारण इरानले २०२६ को विश्वकप नखेल्ने

अमेरिकासँग बढ्दो तनाव र द्वन्द्वका कारण इरानले सन् २०२६ को फिफा विश्वकपमा सहभागी नहुने घोषणा गरेको छ। इरानका खेलकुद मन्त्री अहमद दुन्यामालीले अमेरिकी आक्रमणमा आफ्ना सर्वोच्च नेता आयातोल्लाह अली खामेनीको हत्या गरिएको आरोप लगाउँदै यस्तो परिस्थितिमा फुटबल खेल्न नसकिने बताए। राज्य टेलिभिजनसँग कुरा गर्दै उनले भने, ‘अमेरिकाले हाम्रा नेताको हत्या गरेको अवस्थामा हामी कुनै पनि हालतमा विश्वकपमा सहभागी हुन सक्दैनौँ।’

गत फेब्रुअरी २८ देखि अमेरिका र इजरायल एकातर्फ तथा इरान अर्कातर्फ रहेर द्वन्द्व चर्किएको छ। यो युद्धका कारण पश्चिम एसिया मात्र नभई विश्वको ऊर्जा आपूर्ति शृङ्खलामा समेत ठुलो असर परेको छ। मन्त्री दुन्यामालीले पछिल्लो केही महिनामा युद्धका कारण हजारौँ इरानी नागरिक मारिएको दाबी गर्दै अहिलेको अवस्थामा खेलाडी र नागरिकको सुरक्षा सुनिश्चित नभएको बताए।

सन् २०२६ को फिफा विश्वकप अमेरिका, क्यानडा र मेक्सिकोले संयुक्त रूपमा आयोजना गर्दैछन्। आगामी जुन ११ देखि सुरु हुने यस प्रतियोगितामा इरानको समूह चरणका खेलहरू अमेरिकाका लस एन्जलस र सियाटल जस्ता सहरमा हुने तालिका थियो। यता फिफा अध्यक्ष जियानी इन्फान्टिनोले भने अमेरिकी राष्ट्रपति डोनाल्ड ट्रम्पले इरानी टोलीलाई प्रतियोगितामा स्वागत गर्ने बताएका छन्।

यद्यपि इरान फुटबल महासंघका अध्यक्ष मेहदी ताजले वर्तमान परिस्थितिमा इरानले विश्वकपलाई आशाका साथ हेर्न नसक्ने बताए। विश्वकपको फाइनल खेल जुलाई १९ मा हुने तालिका भए पनि इरानको यो निर्णयले खेल जगतमा नयाँ हलचल पैदा गरेको छ।