अस्ट्रेलियालाई हराउँदै जापानले जित्यो महिला एसियन कपको उपाधि

जापानले आयोजक अस्ट्रेलियालाई पराजित गर्दै महिला एसियन कप फुटबल २०२६ को उपाधि चुमेको छ। सिड्नीमा भएको सनसनीपूर्ण फाइनल भिडन्तमा अस्ट्रेलियालाई १–० गोल अन्तरले पाखा लगाउँदै जापान तेस्रो पटक एसियाली च्याम्पियन बनेको हो। जापानका लागि खेलको पहिलो हाफमा माइका हमानोले करिब १८ मिटर टाढाबाट गरेको उत्कृष्ट प्रहार नै निर्णायक गोल बन्यो।

प्रतियोगिताभर सानदार प्रदर्शन गरेको जापानले ६ खेलमा कुल २९ गोल गर्दा विपक्षीबाट मात्र २ गोल खाएको थियो। नयाँ प्रशिक्षक निल्स निल्सनको नेतृत्वमा जापानले हात पारेको यो पहिलो ठूलो सफलता हो। जितपछि खुसी व्यक्त गर्दै प्रशिक्षक निल्सनले घरेलु टोली र हजारौँ समर्थकका बीचमा खेल्न चुनौतीपूर्ण भए पनि खेलाडीहरूले उत्कृष्ट धैर्यता देखाएको बताए। उनले केही अवसरमा भाग्यले पनि साथ दिएको भन्दै टोलीको प्रदर्शनप्रति गर्व गरे।

यता, घरेलु मैदानमा उपाधि जित्ने लक्ष्य राखेको अस्ट्रेलिया भने तेस्रो पटक जापानसँगै फाइनलमा पराजित हुन पुग्यो। यसअघि सन् २०१४ र २०१८ मा पनि अस्ट्रेलिया जापानसँगै स्तब्ध बनेको थियो। खेल सकिएपछि अस्ट्रेलियाली खेलाडी र समर्थकहरू निकै भावुक देखिएका थिए। जापानले यस जितसँगै एसियाली महिला फुटबलमा आफ्नो बलियो साख पुनः पुष्टि गरेको छ।