आइपिएलको १९औँ सिजन २८ मार्चदेखि सुरु हुँदै, ८४ खेल खेलिने

हैदराबाद । इन्डियन प्रिमियर लिग (आइपिएल) को १९औँ सिजन आगामी २८ मार्चदेखि ३१ मेसम्म आयोजना हुने भएको छ । १० टोलीको सहभागिता रहने यस पटकको सिजनमा कूल ८४ खेलहरू हुनेछन्, जसमा प्रत्येक टोलीले १६–१६ खेल खेल्ने तालिका रहेको छ । उद्घाटन खेल डिफेन्डिङ च्याम्पियन रोयल च्यालेन्जर्स बेंगलोर र सनराइजर्स हैदराबादबीच बेंगलोरको एम चिन्नास्वामी स्टेडियममा हुने तय भएको छ ।

भारतका केही राज्यहरूमा हुने विधानसभा चुनावका कारण हाललाई २८ मार्चदेखि १२ अप्रिलसम्मका २० खेलको मात्र तालिका सार्वजनिक गरिएको छ । भारतीय क्रिकेट नियन्त्रण बोर्ड (बिसिसीआइ) का अनुसार प्रतियोगिताको फाइनल खेल ३१ मेमा बेंगलोरमा हुनेछ । यस सिजनका खेलहरू भारतका १३ फरक सहरहरूमा खेलाइने तयारी छ, जसमा १३ वर्षपछि रायपुरको सहिद भिर नारायण स्टेडियममा पनि आइपिएलका खेलहरू हुने भएका छन् । आरसीबीले यस मैदानलाई आफ्नो दोस्रो होम भेन्यु बनाएको छ ।

यस पटकको आइपिएलमा केही नयाँ नियमहरू पनि लागू गरिएको छ । म्याचको दिन कुनै पनि टोलीले नेट अभ्यास गर्न पाउने छैनन् भने खेलाडीहरूले अनिवार्य रूपमा टोलीकै बसमा यात्रा गर्नुपर्ने छ । अनुशासनलाई कडाइ गर्दै परिवारका सदस्यहरूलाई केवल आतिथ्य क्षेत्रमा मात्र अनुमति दिइएको छ भने मैदान वा डगआउटमा प्रवेश निषेध गरिएको छ । त्यस्तै, ओरेन्ज र पर्पल क्याप विजेताले फिल्डिङको सुरुवाती दुई ओभर अनिवार्य रूपमा क्याप लगाउनुपर्ने नियम बनाइएको छ ।

यस सिजनको अक्सनमा क्यामरुन ग्रिन सबैभन्दा महँगो खेलाडी बनेका छन् । उनलाई कोलकाता नाइट राइडर्सले २५.२० करोड भारुमा अनुबन्ध गरेको हो । त्यस्तै, भारतीय अनक्याप्ड खेलाडीहरू प्रशान्त वीर र कार्तिक शर्मालाई चेन्नई सुपर किंग्सले १४.२० करोडका दरले भित्र्याएको छ । नेपालमा आइपिएलका खेलहरू कान्तिपुर म्याक्स टेलिभिजनबाट प्रत्यक्ष प्रसारण हुनेछन् ।