
दाङ । दाङको राप्ती गाउँपालिका-४ गोपीनालामा बिहीबार राति भएको एक युवकको हत्यामा संलग्न रहेको अभियोगमा प्रहरीले एक युवतीसहित तीन जनालाई पक्राउ गरेको छ। पक्राउ पर्नेहरूमा बंगलाचुली निवासी २० वर्षीय सन्दीप वली, राप्ती गाउँपालिकाका १८ वर्षीय निश्चल चौधरी र सोही ठाउँकी १८ वर्षीया आकृति बुढा रहेका छन्।
बिहीबार राति राप्ती गाउँपालिका-२ बराखुट्टी निवासी १६ वर्षीय स्मित प्रधानको हत्या गरी गोपीनालाको दोलाईखोला नजिकै नालामा फालिएको अवस्थामा शव फेला परेको थियो। उक्त घटनामा प्रधानका साथी १६ वर्षीय आयुष्मान थापा घाइते अवस्थामा भेटिएका थिए। घाइते थापाको राप्ती आधारभूत अस्पताल सिसहनियाँमा उपचार भइरहेको र उनी हाल खतरामुक्त रहेको प्रहरीले जनाएको छ।
घटनाको प्रारम्भिक अनुसन्धानका क्रममा आयुष्मान थापा मगरलाई ‘देवीसरा गाहा’ र ‘स्वस्तिका रानामगर’ नाम गरेको फेसबुक म्यासेन्जर आइडीबाट भेट्न आउनु भनी बोलाइएको खुलेको छ। सोही निम्तोका आधारमा उनीहरू बिहीबार राति ८ बजे घरबाट निस्किएका थिए। प्रहरीले घटनाको थप कारण र संलग्नताका बारेमा विस्तृत अनुसन्धान गरिरहेको बताएको छ।

























