
विराटनगर । जबरजस्ती करणी मुद्दाका एक फरार प्रतिवादी ९ वर्षपछि पक्राउ परेका छन् । जबरजस्ती करणी मुद्दामा अदालतबाट दोषी ठहर भई ९ वर्षदेखि फरार रहेका विश्वजित चाम्लिङलाई प्रहरीले पक्राउ गरेको छ ।
सुनसरीको धरान उपमहानगरपालिका–८ का २७ वर्षीय सानु राई भनिने विश्वजित चाम्लिङलाई ९ वर्षपछि उनलाई बुधबार आफ्नै घरबाट पक्राउ गरिएको प्रहरीले जनाएको छ । चाम्लिङमाथि धरान–८ की १४ वर्षीया बालिकालाई जबरजस्ती करणी गरेको अभियोगमा मुद्दा दायर भएको थियो ।
उक्त मुद्दामा जिल्ला अदालत सुनसरीले २०७३ साल भदौ १६ गतेको फैसलामार्फत उनलाई ११ वर्ष कैद सजाय सुनाएको थियो । अदालतको फैसला लगत्तै उनी फरार भएका थिए। लामो समयदेखि लुकिछिपी बस्दै आएका चाम्लिङलाई विशेष सूचनाका आधारमा पक्राउ गरी आवश्यक कानुनी कारबाही र कैद भुक्तानका लागि जिल्ला अदालत सुनसरीमा बुझाइएको प्रहरीले जनाएको छ।

























