सप्तरीको भारदहमा ग्यास लिक भई आगलागी हुँद एक घर जलेर नष्ट 

राजविराज । सप्तरीको हनुमाननगर कंकालिनी नगरपालिका–१ भारदहमा शनिबार दिउँसो ग्यास लिक भएर आगलागी हुँदा एक घर जलेर नष्ट भएको छ । स्थानीय धर्मदेव दासको घरमा भएको आगलागीबाट करिब ३५ लाख रुपैयाँ बराबरको क्षति भएको प्रहरीले जनाएको छ ।

प्रहरीका अनुसार खाना पकाउने ग्यास लिक भएर अचानक सल्किएको आगोले दासको जस्तापाताले छाएको ४ कोठे घर र ३ कोठे भान्सा घर पूर्ण रूपमा नष्ट भएको छ ।

Advertisement

आगलागी सुरु भए लगत्तै नगरपालिकाको वारुणयन्त्र (दमकल) लाई खबर गरिए पनि घटनास्थलसम्म पुग्ने बाटो अत्यन्तै साँघुरो भएका कारण समयमै दमकल पुग्न सकेन । बाटोको अवरोधले दमकल पुग्न ढिलाइ हुँदा आगोले उग्र रूप लिएको र घरभित्र रहेका खाद्यान्न, लत्ताकपडा, फर्निचर तथा अन्य महत्त्वपूर्ण कागजातहरू जोगाउन नसकिएको प्रहरीले जनाएको छ ।

दमकल समयमै पुग्न नसके पनि स्थानीय बासिन्दा, प्रहरी र पछि आइपुगेको नगरपालिकाको वारुणयन्त्रको संयुक्त र अथक प्रयासबाट आगो नियन्त्रणमा लिइएको थियो । आगो छिमेकी घरहरूमा फैलिन नदिएका कारण थप ठुलो क्षति हुनबाट जोगिएको प्रहरीले जनाएको छ ।

प्रहरीका अनुसार आगलागीमा परी कुनै मानवीय वा चौपाया क्षति भने भएको छैन । तर, पीडित परिवारको वासस्थान र गाँसको जोहो गर्ने सबै सामग्री नष्ट भएकाले उनीहरू बिचल्लीमा परेका छन् ।