देशभर व्यक्तिगत घटना दर्ता सचेतना अभियान सुरु हुँदै

काठमाडौं । देशभरका ७५३ वटै स्थानीय तहमा आज (बुधबार)देखि व्यक्तिगत घटना दर्ता सचेतना सप्ताह सुरु हुँदैछ ।

नागरिकको कानुनी पहिचान सुदृढ बनाउने तथा राज्यबाट प्राप्त हुने सेवा सुविधामा सहज पहुँच सुनिश्चित गर्ने उद्देश्यसहित यो कार्यक्रम सञ्चालनमा ल्याइएको हो । राष्ट्रिय परिचयपत्र तथा पञ्जीकरण विभागको आग्रहमा सुरु गरिएको यस सप्ताहअन्तर्गत विभिन्न स्थानीय तहले जनचेतनामूलक कार्यक्रम आयोजना गर्नेछन् ।

Advertisement

जन्म, मृत्यु, विवाह, बसाइँसराइलगायतका व्यक्तिगत घटना समयमै दर्ता गर्नुपर्ने महत्त्वबारे नागरिकलाई जानकारी गराउने लक्ष्य राखिएको छ । विभागका अनुसार व्यक्तिगत घटना दर्ता नहुँदा नागरिकले शिक्षा, स्वास्थ्य, सामाजिक सुरक्षा भत्ता जस्ता आधारभूत सेवाबाट वञ्चित हुने अवस्था रहन्छ ।

त्यसैले स्थानीय तह, विद्यालय, सामुदायिक संस्था तथा स्वयंसेवी समूहको सहकार्यमा गाउँ टोलसम्म पुगेर सचेतना फैलाइने जनाइएको छ । यस क्रममा विद्यार्थी, शिक्षक, जनप्रतिनिधि र कर्मचारीलाई सहभागी गराई सचेतनामूलक र्‍याली, अन्तरक्रिया तथा सूचना प्रवाह कार्यक्रम सञ्चालन गरिनेछ ।

विभागले चैत अन्तिम साता नै परिपत्र जारी गर्दै सबै स्थानीय तहलाई सप्ताह प्रभावकारी रूपमा मनाउन निर्देशन दिएको थियो । सरकारले व्यक्तिगत घटना दर्तालाई व्यवस्थित बनाउँदै डिजिटल प्रणालीमा रूपान्तरण गर्ने लक्ष्य अघि सारेको छ । जसले सेवा प्रवाहलाई अझ सरल र पारदर्शी बनाउने अपेक्षा गरिएको छ ।