अस्पतालमा पनि दुई दिन बिदा लागू, आकस्मिक सेवा भने निरन्तर खुला

काठमाडौं । सरकारले अब अस्पतालहरूमा पनि शनिबार र आइतबार सार्वजनिक बिदा लागू गर्ने निर्णय गरेको छ । स्वास्थ्य तथा जनसंख्या मन्त्रालयले जारी गरेको सूचनाअनुसार ‘हप्तामा दुई दिन बिदा’ नीति स्वास्थ्य क्षेत्रमा समेत कार्यान्वयनमा ल्याइएको हो ।

यस निर्णयअनुसार नियमित ओपीडी लगायतका सेवा दुई दिन बन्द रहनेछन् । तर, आकस्मिक, अन्तरंग (इनडोर) तथा अत्यावश्यक शल्यक्रिया सेवा भने चौबिसै घण्टा सञ्चालनमै रहने मन्त्रालयले जनाएको छ ।

पहिले नै तय गरिएका आइतबारका शल्यक्रियाहरू बिरामीको अवस्था हेरी पुनः तालिका मिलाइनेछ । मन्त्रालयले बिदाका दिनमा पनि बिरामीले समस्या नपाओस् भन्ने उद्देश्यले आकस्मिक कक्ष, प्रसूति सेवा, आईसीयू लगायत सेवा निरन्तर सञ्चालन गर्न निर्देशन दिएको छ ।

कुनै सेवा उपलब्ध नभएमा नजिकको उपयुक्त अस्पतालमा तुरुन्तै रेफर गर्न र एम्बुलेन्स तयारी अवस्थामा राख्न पनि अस्पतालहरूलाई भनिएको छ । सरकारले स्वास्थ्यकर्मीको कामको बोझ घटाउन र मनोबल बढाउन यो निर्णय गरेको बताएको छ ।