बिर्तामोडको डान्सबारमा झगडाः २ जना घाइते, ३ पक्राउ

बिर्तामोड। झापाको बिर्तामोडस्थित एक डान्सबारमा भएको झगडामा परी दुईजना घाइते भएका छन्। बिर्तामोड नगरपालिका-२ स्थित गन्तव्य डान्सबारमा आइतबार राति करिब १:३० बजेको समयमा युवाहरूबीच कुटपिट भएको हो।

झगडामा परी मेचीनगर नगरपालिका-१ का २० वर्षीय सिद्धार्थ शाही र ३० वर्षीय कर्ण राई घाइते भएका छन्। शाहीको टाउकोमा चोट लागेको छ भने राईको अनुहारमा चोट लागेको प्रहरीले जनाएको छ। दुवै घाइतेको अवस्था सामान्य रहेको र उनीहरूको बिर्तामोडस्थित बीएण्डसी अस्पतालमा उपचार भइरहेको छ।

इलाका प्रहरी कार्यालय अनारमनीबाट खटिएको प्रहरी टोलीले कुटपिटमा संलग्न ३ जनालाई नियन्त्रणमा लिएको छ। पक्राउ पर्नेहरूमा मेचीनगर-१२ का २१ वर्षीय निशान लामा र २२ वर्षीय प्रशान्त लिम्बु तथा भद्रपुर नगरपालिका-८ का २२ वर्षीय नित्य राजवंशी छन्।

घटनामा संलग्न अर्जुनधारा नगरपालिका बस्ने २० वर्षीय लाक्पा तामाङ भने फरार रहेका छन्। उनको खोजी कार्य तीव्र पारिएको र पक्राउ परेकाहरूमाथि थप अनुसन्धान भइरहेको प्रहरीले जनाएको छ।