नगरपालिकाले भत्कायो आफ्नै निर्माणाधीन भवन

खोटाङ । खोटाङको हलेसी तुवाचुङ नगरपालिकाले आफ्नै निर्माणाधीन प्रशासनिक भवन भत्काएको छ । भवन निर्माणमा गुणस्तरहीन सामग्री प्रयोग गरिएको पाइएपछि भवन भत्काइएको नगरपालिकाले जनाएको छ ।

नगरपालिकाको प्राविधिक, नगरप्रहरी र कर्मचारीसहितको टोलीले मंगलबार निर्माणाधीन भवन भत्काइदिएको हो । नगरपालिकाका प्रवक्ता कमल गिरीले भवनमा लगाइएको इँटा गुणस्तरहीन भएकाले भत्काइएको जानकारी दिए ।

Advertisement

भवन निर्माणको ठेक्का आकाश निर्माण सेवा सिन्धुपाल्चोकले लिएको थियो । सहरी विकास मन्त्रालय र नगरपालिकाको साझेदारीमा ५ करोड ८७ लाख १८ एक सय ३० रूपैयाँको बजेटमा १८ महिनाभित्र सक्ने गरी २०८२ मंसिर १३ गते सम्झौता भएको थियो ।

आर्थिक मितव्ययितासहित गुणस्तरीय काम गराउने सन्दर्भमा प्राविधिकसहितको निरीक्षण टोलीले अनुगमन गर्ने क्रममा भवनको दोस्रो तलाको काम गुणस्तरहीन पाइएकाले भत्काइएको गिरीले बताए । ‘आर्थिक मितव्ययितासहितको गुणस्तरीय काम गराउने अभियानमा छौं,’ गिरीले भने, ‘यस सन्दर्भमा प्राविधिकसहितको निरीक्षण टोलीले अनुगमन गर्ने क्रममा गुणस्तरीन पाइएकाले भत्काइएको हो ।’

निर्माणमा सम्बद्ध कम्पनीका सोम थिङले केही इँटा मिसिएर आएकाले काम गर्ने सिलसिलामा प्रयोग भएको स्वीकारेका छन् । तर, गुणस्तरहीन इँटा प्रयोग भएको भन्दैमा एक्कासि भत्काएको गुनासो थिङले गरेका छन् ।

‘इँटा भट्टामा नगई फोनको भरमा काम गरियो । केही गुणस्तरहीन इँटा मिसिएर आएछ,’ थिङले भने, ‘काम गर्ने सिलसिलामा त्यही गुणस्तरहीन इँटा प्रयोग भएछ । यसलाई निकाल भन्दिएको भए हामी निकाल्थ्यौं, सुध्रने अवसर नदिई ‘होपलेस’ गराउन खोजियो ।’ नगरपालिकाले भने गुणस्तरहीन काममा सम्झौता नहुने जनाएको छ ।