पाथीभरामा तीर्थयात्री सहजकर्ताका लागि उमेर हद तोकियो

ताप्लेजुङ । प्रसिद्ध धार्मिक स्थल पाथीभरा क्षेत्रमा अब १८ वर्ष पूरा भई ५५ वर्ष ननाघेका व्यक्तिहरूले मात्र तीर्थयात्री सहजकर्ता’ (भरिया) को रूपमा काम गर्न पाउने भएका छन् ।

पाथीभरा क्षेत्र विकास समितिले तीर्थयात्रीहरूको सुरक्षा र सेवालाई थप व्यवस्थित बनाउन यस्तो उमेर हद तोकेको हो । विकास समितिले १८ देखि ५५ वर्ष उमेर समूहका इच्छुक व्यक्तिहरूलाई आगामी वैशाख २४ गते बिहीबारभित्र आवेदन दिन आह्वान गरेको छ ।

Advertisement

समितिका कार्यकारी निर्देशक प्रजिन हाङवाङका अनुसार, यसअघि तीर्थयात्री सहजकर्ताहरूले काफ्लेपाटी–फेदीस्थित होटेल व्यवसायी संघमार्फत परिचयपत्र लिएर काम गर्दै आएका थिए । अब भने विकास समिति आफैँले उमेर समूह निश्चित गरी सबै सहजकर्ताहरूको विस्तृत व्यक्तिगत विवरण अद्यावधिक गर्न लागेको हो ।

यो नयाँ व्यवस्थासँगै पाथीभरा क्षेत्रको तीर्थाटन थप सुरक्षित, मर्यादित र व्यवस्थित हुने अपेक्षा गरिएको छ। विवरण संकलन पश्चात समितिले आधिकारिक परिचयपत्र वितरण गरी उनीहरूलाई जिम्मेवारी तोक्ने योजना बनाएको छ।