सशस्त्र प्रहरी महानिरीक्षक नारायणदत्त पौडेलले लगाए दर्ज्यानी चिह्न

काठमाडौं । सशस्त्र प्रहरी बल नेपालका नवनियुक्त महानिरीक्षक (आइजिपी) नारायणदत्त पौडेलले दर्ज्यानी चिह्न (फुली) लगाएका छन् ।

गृह मन्त्रालयमा आयोजित एक विशेष समारोहका बीच सचिव राजकुमार श्रेष्ठले नवनियुक्त आइजिपी पौडेललाई दर्ज्यानी चिन्ह लगाइ दिएका हुन् । सोमबार बसेको मन्त्रिपरिषद् बैठकले सशस्त्र प्रहरी अतिरिक्त महानिरीक्षक (एआइजी) बाट पौडेललाई महानिरीक्षक पदमा बढुवा गर्ने निर्णय गरेको थियो ।

निवर्तमान आइजिपी राजु अर्यालले १८ वैशाखदेखि अनिवार्य अवकाश पाएपछि सरकारले पौडेललाई सशस्त्र प्रहरीको नेतृत्व सुम्पिएको हो । दर्ज्यानी चिन्ह लगाएपछि महानिरीक्षक पौडेलले सशस्त्र प्रहरी बलको कमान्ड औपचारिक रूपमा समाले छन् ।

दर्ज्यानी चिन्ह सुशोभन समारोहमा गृह मन्त्रालयका उच्च पदस्थ अधिकारीहरू र सशस्त्र प्रहरीका वरिष्ठ अधिकृतहरूको उपस्थिति रहेको थियो । पदभार ग्रहण गर्दै नवनियुक्त आइजिपी पौडेलले संगठनको व्यावसायिकता, सुदृढीकरण र सीमा सुरक्षालाई प्राथमिकतामा राखेर काम गर्ने प्रतिबद्धता समेत व्यक्त गरे ।