‘लालीबजार’ प्रदर्शनको बाटो खुल्यो

काठमाडौं । नेपाली चलचित्र ‘लालीबजार’को प्रदर्शन रोक्न माग गर्दै दायर गरिएको रिटमा उच्च अदालत पाटनले अन्तरिम आदेश जारी गर्न अस्वीकार गरेपछि चलचित्र प्रदर्शनको बाटो खुलेको छ ।

उच्च अदालत पाटनका न्यायाधीश खडानन्द तिवारी र नेत्रप्रकाश आचार्यको संयुक्त इजलासले रोशनी नेपालीद्वारा दायर गरिएको रिट निवेदनमाथि सुनुवाइ गर्दै तत्काल चलचित्र प्रदर्शन रोक्ने किसिमको अन्तरिम आदेश दिन नपर्ने निर्णय गरेको हो । अदालतको आदेशसँगै ‘लालीबजार’ अब प्रदर्शन गर्न कानुनी अवरोध हटेको छ ।

Advertisement

यसअघि वैशाख १५ गते भएको प्रारम्भिक सुनुवाइमा अदालतले अल्पकालीन आदेश जारी गर्दै दुवै पक्षलाई छलफलका लागि उपस्थित गराएको थियो । सोही क्रममा अदालतले चलचित्रसँग सम्बन्धित विषयमा आवश्यक कागजात, विशेषगरी केन्द्रीय चलचित्र जाँच समितिबाट अनुमति दिँदा तयार गरिएको सक्कल फाइल झिकाउन समेत आदेश दिएको थियो ।

रोशनी नेपालीले चलचित्रमा बादी समुदायप्रति ठेस पुग्ने सामग्री समावेश भएको दाबी गर्दै उच्च अदालतमा रिट दायर गरेकी थिइन् । सोही उजुरीपछि चलचित्रको निर्धारित प्रदर्शन रोकिएको थियो । ‘लालीबजार’ वैशाख १८ गतेदेखि प्रदर्शनमा आउने तयारीमा रहेको भए पनि कानुनी विवादका कारण रोकिएको थियो ।

अदालतले दुवै पक्षका तर्क र प्रस्तुत प्रमाणहरूको प्रारम्भिक मूल्यांकनपछि तत्काल रोक लगाउने अवस्था नदेखिएको निष्कर्ष निकाल्दै अन्तरिम आदेश जारी नगर्ने निर्णय गरेको हो । यससँगै चलचित्र निर्माण पक्षलाई राहत मिलेको छ भने प्रदर्शनको तयारी पुनः अघि बढ्ने भएको छ । अब औपचारिक कानुनी अवरोध हटेसँगै ‘लालीबजार’ देशभर प्रदर्शनमा आउने बाटो खुलेको हो ।